पोखरा । गत शुक्रबार सार्वजनिक भएको कक्षा १२ को परीक्षामा पोखरा तीन जना विद्यार्थीले उत्कृष्ट नतिजा ल्याएका छन् ।
पोखरा महानगरपालिका वडा नं १ सिम्पानीस्थित करुणानिधि एजुकेशन फाउण्डेशन (केफ) माविका साहिल गुरुङ, आकृति पराजुली र स्वेच्छा गौतम जिल्लामै प्रथम भएका हुन् ।
सो विद्यालयबाट २०२ जना विद्यार्थी कक्षा १२ को परीक्षामा सहभागी भएका थिए । जसमा व्यवस्थापन सङ्कायतर्फ एक र कानून सङ्कायतर्फ दुई विद्यार्थीले कास्कीमै प्रथम स्थान हासिल गरेका हुन् ।
केफका साहिल गुरुङले व्यवस्थापनतर्फ ३.७५ जिपिए प्राप्त गरी कास्कीमै प्रथम भएको केफ माविका शिक्षक ईश्वर प्रसाद खनालले जानकारी दिए ।
यसैगरी कानून सङ्कायतर्फ आकृति पराजुली र स्वेच्छा गौतमले ३.६२ जिपिए ल्याएर कास्की जिल्लामै प्रथम भएकी छन् ।
