कञ्चनपुर। कञ्चनपुरमा गठबन्धन स्वीकार नगर्ने नेपाली कांग्रेसले निर्णय गरेको छ।
केन्द्रमा सत्तारुढ ५ दलीय गठबन्धन गरी निर्वाचनमा होमिने सहमति गरे पनि कञ्चनपुरको निर्वाचन क्षेत्र नम्बर १ मा भने गठबन्धन स्वीकार नगर्ने निर्णय गरिएको हो।
सङ्गठनात्मक हिसाबले बलियो रहेको निर्वाचन क्षेत्र १ मा नेपाली कांग्रेस एक्लै निर्वाचन जित्न सक्षम रहेकाले गठबन्धन अस्वीकार गर्ने निर्णय गरिएको नेपाली कांग्रेस कञ्चनपुर १ का क्षेत्रीय सभापति गोपीप्रसाद उपाध्यायले बताए।
गत वैशाख ३० मा सम्पन्न स्थानीय तहको निर्वाचनमा क्षेत्रका ४ मध्य २ पालिका नेपाली कांग्रेसले जितेको थियो। कांग्रेसको एक्लै निर्वाचन जित्ने हैसियत रहेकाले गठबन्धन नगर्ने निर्णयमा पुगेको क्षेत्रीय सभापति उपाध्यायले बताए।
यस अघि नेपाली कांग्रेसले डोटी र डडेल्धुरामा पनि प्रदेश सभा र प्रतिनिधि सभाको चुनावमा गठबन्धन नगर्ने निर्णय गरिसकेका छन् ।
