काठमाडौं। राष्ट्र बैङ्कले यस वर्षको दसैँ, तिहार र छठ पर्वका लागि करिब १० अर्बको नयाँ नोट सटही सुविधा प्रदान गर्ने भएको छ।
मुद्रा व्यवस्था विभाग प्रमुख रेवतीप्रसाद नेपालले यो वर्षको दसैँ, तिहार र छठ पर्वका लागि भदौ अन्तिम सातादेखि नयाँ नोट सटही सुविधा प्रदान गर्ने जानकारी दिए।
बैङ्कले ५, १०, २०, ५० र १०० दरका नयाँ नोट सटही सुविधा प्रदान गर्ने जनाएको छ।
नयाँ नोट सटहीका लागि राष्ट्र बैङ्कले भदौ २६ देखि बैङ्क तथा वित्तीय संस्थाहरूलाई सुविधा प्रदान गर्ने छ भने सर्वसाधारणका लागि भदौ २९ वा असोज २ गतेदेखि नयाँ नोटको सटही सुविधा दिने आन्तरिक तयारी भइरहेको छ।
राष्ट्र बैङ्कले बैङ्क तथा वित्तीय संस्थालाई दुईदेखि पाँच करोड रुपैयाँसम्म नयाँ नोट सटही सुविधा दिने छ ।
गत वर्ष जस्तै सर्वसाधारणले यो वर्ष पनि प्रतिव्यक्ति १८ हजार पाँच सय रुपैयाँसम्मका नयाँ नोट साट्न पाउने छन्। यो पाँचदेखि एक सय रुपैयाँसम्मको एक–एक वटा बन्डल हो।
