हेटौंडा । मकवानपुरको मनहरी गाउँपालिका–१ का वडाध्यक्ष शिवप्रसाद खनाल विद्यालय भर्ना भएका छन् ।
५१ वर्षीय खनाल कक्षा ११ को शिक्षा संकाय अध्ययन गर्न थालेका हुन्। बाराको कलैयास्थित सिद्धेश्वर संस्कृत विद्यालयबाट २०४८ सालमा एसएलसी उत्तीर्ण गरेपछि उनको औपचारिक शिक्षा रोकिएको थियो।
तर, उनै खनाल पढाइ छाडेको ३१ वर्षपछि गाउँकै बाल जीवनज्योति माविमा भर्ना भएका छन्।
विद्यालय व्यवस्थापन समिति अध्यक्षसमेत रहेका खनालले शैक्षिक योग्यता नहुँदा विभिन्न अवसरबाट वञ्चित हुनुपरेको थियो। क्षमता अभिवृद्धि गर्न र अधुरा सपनालाई अघि बढाउन कक्षा ११ मा भर्ना भएको उनले बताए।
