काठमाडौं। मंसिर ४ गते हुने स्थानीय तहको निर्वाचनको सरगर्मी सबैतिर बढेको छ।
विशेष गरेर राजनीतिक दलका नेताहरूलाई चुनावी सरगर्मीले बढिछोएको छ।
चुनावमा टिकट पाउनका लागि उनीहरुको दौडधुप बढेको छ। उनीहरु टिकट पक्का गर्न शिर्ष नेतृत्वसँगको भेटघाटलाई तीव्रता दिइरहेका छन्।
यसपटक टिकटका लागि सत्ता गठबन्धनमा रस्साकस्सी परेको छ। गठबन्धनमा रहेको सबै दलले दाबी गर्दा सिटको टुंगो लगाउन पनि सकस परेको छ।
राष्ट्रिय राजनीतिमा चर्चाको केन्द्रमा रहेको चितवनमा गठबन्धनका नेताहरु प्छिल्लो केही सातादेखि काठमाडौंमा छन्। उनीहरु टिकटका लागि प्रधानमन्त्रीसमेत रहेका कांग्रेस सभापति शेरबहादुर देउवा भन्दा बढी माओवादी केन्द्रका अध्यक्ष प्रचण्डकोे निवासमा बढी भेटिन्छन्।
उनीहरु टिकटका लागि आफ्नो दलका नेता भन्दा माओवादी केन्द्रका अध्यक्ष प्रचण्डलाई रिजाइ रहेका छन्।
स्रोतका अनुसार चितवन कांग्रेसका नेताहरु प्रचण्डलाई रिझाउन दैनिक रुपमा खुमलटार जाने गरेका छन्। उनीहरुले प्रचण्डलाई चितवनमा संघ, प्रदेश र समानुपातिकमा टिकट दिलाइदिन अनुरोध गर्ने गरेका छन्।
चितवन कांग्रेसका नेताहरु प्रचण्ड निवास किन धाउँदैछन् ? यो प्रश्नमा एक नेता भन्छन्, ‘काग्रेसको ताला चाबी नै सभापति देउवाज्यूले प्रचण्डलाई दिनुभएको छ। प्रचण्डको जित पक्का गराउन लाग्ने भनेर कांग्रेसका नेताहरु लागिरहनुभएको छ। प्रचण्डबाट पनि नाम सिफारिस भएपछि टिकट पक्का हुन्छ कि भन्ने आश हो।’
चितवन कांग्रेसका नेताहरु प्रचण्डको जित पक्का गराउन लाग्ने शर्तमा प्रचण्डलाई फकाइरहेका छन्।
चितवन क्षेत्र नम्वर ३ मा गठबन्धनका तर्फबाट माओवादी केन्द्रका अध्यक्ष पुष्पकमल दाहाल ‘प्रचण्ड’ चुनाव लड्ने पक्कापक्की भइसकेको छ। त्यसबाहेक अन्य क्षेत्र र प्रदेशमा कांग्रेस चितवनका नेताहरुको लविङ छ।
प्रचण्डले पनि आफ्नो क्षेत्र सुरक्षित गर्नका लागि कांग्रेसका सबै नेताहरुलाई आश्वासन दिइरहेका छन्।
