काठमाडौं। मकवानपुरको भीमफेदी गाउँपालिकामा बस दुर्घटना हुँदा मृत्यु हुनेको संख्या ७ पुगेको छ।
काठमाडौंबाट हेटौंडाका लागि छुटेको बा ३ ख ७८५८ नम्बरको बस भीमफेदी गाउँपालिकाको जुरीखेतमा दुर्घटना हुँदा ७ जनाको मृत्यु भएको जिल्ला प्रहरी कार्यालय मकवानपुरले जनाएको छ।
जिल्ला प्रहरी कार्यालय मकवानपुरका प्रमुख बामदेव गौतमले दुर्घटनामा परेर ६ जनाको घटनास्थलमै र १ जनाको उपचारका क्रममा मृत्यु भएको जानकारी दिए।
दुर्घटनामा परेर १७ जना यात्रु घाइते भएका छन्। अनियन्त्रित भएर बस दुर्घटना भएको र बसका चालक फरार छन्।
यस्तै, रुकुम–पूर्वमा बस दुर्घटना हुँदा ४ जनाको मृत्यु भएको छ भने १२ जना घाइते भएका छन्।
काठमाडौंबाट रुकुम पूर्वतर्फ जाँदै गरेको धौलागिरी यातायातको ग १ ख ९१०९ नम्बरको बस मध्यपहाडी लोकमार्ग भूमे गाउँपालिका–२ थाबाङ बगरमा दुर्घटनामा परेको हो।
घाइतेलाई उद्धार गरी उपचारका लागि जिल्ला अस्पताल रुकुमपूर्व पठाइएको छ।
