काठमाडौं। अमेरिकाकी चर्चित स्की पर्वतारोही हिलारी नेल्सन गोरखाको मनास्लु हिमालमा मृत फेला परेकी छन्।
गत सोमबार बिहान मनास्लुको चुचुरोमा पुगेकी ४९ वर्षीया नेल्सन स्की गरेर फर्किने बेलामा २ हजार फिट गहिरो खोंचमा खसेर हराएकी थिइन्।
सांग्रिला नेपाल ट्रेकका प्रमुख जीवन घिमिरेले बुधबार बिहान नेल्सन मृत फेला परेको जानकारी दिए।
उनको शवलाई निकालेर काठमाडौं ल्याउने तयारी भइरहेको प्रहरीले जनाएको छ।
दुई दशकदेखि स्की पर्वतारोहणमा संलग्न नेल्सनले विभिन्न १६ मुलुकमा ४० वटा आरोहण गरेकी थिइन्।
४९ वर्षीया हिलारी नेल्सनले स्की खेलेरै विश्वभरि चर्चा कमाएकी थिइन्। नेल्सनले आफ्ना ठूला उपलब्धि नेपाली हिमालमै प्राप्त गरेकी थिइन्।
हिलारीले सन् २०१८ मा मोरिसनसँगै स्की गर्दै ल्होप्से हिमालको चुचुरोबाट अवरोहण गरेकी थिइन्। ८ हजार मिटरमाथिको दुईवटा हिमालको चुचुरोबाट स्की गर्दै अवरोहण गरेको कीर्तिमान पनि उनको नाममा रहेको छ।
अमेरिकाको सियाटलमा जन्मिएकी हिलारीलाई सन् २०१८ मा नेसनल जोग्रोफिकले साहसी खेलाडीको सूचीमा राखेको थियो। सन् २००५ मा उनले चोयु हिमालको चुचुरोबाट स्की गरेकी थिइन्।
यसअघि सोमबार नै मनास्लुमा आएको हिमपहिरोमा परी एक जनाको आरोहण सहयोगी अनुप राईको मृत्यु भएको थियो।
