काठमाडौं। नेकपा एमालेका नेता डा.भीम रावलले राष्ट्रिय राजनीतिको गति र पार्टीको मतिअनुरुप आगामी दिनमा पाइला चाल्ने बताएका छन्।
टिकट नपाएपछि आज पत्रकार सम्मेलन गर्दै रावलले राष्ट्रिय राजनीतिको गति र पार्टीको मतिअनुरुप आगामी दिनमा पाइला चाल्ने बताएका हुन्। उनले पार्टीमै रहेर संघर्ष गर्ने बताए।
उनले आफूलाई टिकट नदिने एमाले अध्यक्ष केपी ओलीले गरेको निर्णय गलत, स्वेच्छाचारी र अन्यायपूर्ण रहेको बताए।
सम्बन्धित समाचारः
मलाई हराउन नसकिने निष्कर्षमा पुगेपछि ओलीले टिकट खोसेः डा.भीम रावल
लिखित मन्तव्यमा रावलले एमाले अध्यक्ष ओलीमाथि विभिन्न आरोप लगाएका छन्।
रावलले देशभक्त उम्मेदवारहरूलाई विजयी बनाउन लाग्न नेता कार्यकर्ताहरूलाई आह्वान गरे। उनले आफूले एमालेको टिकटधारी सबै उम्मेदवारलाई विजयी गराउन आह्वान गर्न नसक्ने बताए।
उनले भने, ‘एमालेमा त होली वाइनवालाले पनि टिकट पाएका छन्। संविधान दिवसमा कालो दिवस मनाउनेले पनि पाएका छन्। जसकाविरुद्ध एमाले कार्यकर्ताले रगत बगाउनुपर्यो उनीहरूलाई मैले कसरी विजयी गराउन आह्वान गर्नसक्छु। मैले यति मात्रै भन्न सक्छु देशभक्त उम्मेदवारलाई विजयी गराउनुस्।’
