बाजुरा। नेकपा एकीकृत समाजवादीका बाजुरा जिल्ला अध्यक्ष गगन रावल एमालेमा फर्किएका छन्।
चुनावी अभियान सुरु हुने क्रममा शुक्रबार उनलाई बाजुरामा आयोजित एक कार्यक्रममा एमाले स्थायी कमिटी सदस्य तथा प्रतिनिधि सभाका उम्मेदवार कर्णवहादुर थापालगायतका नेताहरुले पार्टीमा स्वागत गरे।
रावल एकीकृत समाजवादीका केन्द्रीय कमिटी सदस्यसमेत थिए।
श्रीमतीलाई समानुपातिक उम्मेदवार नबनाउँदा एमालेमा प्रवेश गरेको रावलमाथि आरोप लागेको छ।
युवा संघ नेपालका अध्यक्ष नरेश कुमार शाहीले रावल आफू चुनाव लड्न डराएको तर श्रीमतीलाई समानुपातिक उम्मेदवार नबनाउँदा एमालेमा प्रवेश गरेको आरोप लगाए।
शाहीको स्टाटस हेर्नुस्ः
आफु नेतृत्वमा छ, सङ्गठन बनाउने काममा चासो छैन । भेट्ने, सल्लाह, छलफल र योजना बनाउने कुरामा घरको ढोका छोडेर एक पाइला हिड्दैनन । सङ्गठन निर्माणमा चासो छैन तर अर्को साथिले पार्टी निर्माणमा लागौं भन्दा र आफ्नो मत खुलस्त राख्दा उसमाथि गुनासो र दोषारोपण गर्छन । चुनाव लड्ने कुरा गर्दा सङ्गठन नै कमजोर छ हारिन्छ, कसरी लड्ने भन्छन तर श्रीमतीको नाम समानुपातिक लिष्टमा परेन भनेर गनगन गरिरहन्छन । यी र यस्ता सामान्य कुराहरूमा पार्टी नै छोडेर हिड्छन साथिहरु । मुल नेतृत्व उहीँ छ तर मुनिकालाइ दोष दिन्छन र जिम्मेवारीवाट भाग्छन, गैरजिम्मेवारीको पराकाष्ठा । कोइ वात छैन यात्रामा भेटिने छुट्टिने क्रम निरन्तर भैरहन्छ, कोइ छुट्छन कोइ थपिन्छन ।
