डडेल्धुरा । कांग्रेस नेतृ एवं प्रधानमन्त्रीपत्नी आरजु राणा विवादास्पद अभिव्यक्तिका कारण बारम्बार आलोचित हुने गरेकी छिन् डडेल्धुरामा पुगेर फेरि उनले यस्तै विवादास्पद भाषण गरेकी छन् । भोट माग्ने क्रममा आरजुले हेलिकोप्टरमा उडेर आउनसक्ने मान्छेलाई जिताउन मतदातालाई आग्रह गरिन् ।
'यो गाउँठाउँलाई बनाउने, यो व्यवस्थालाई अगाडि सार्ने, संविधानको रक्षा गर्ने, हाम्रो देशमा शान्ति हुने, समृद्धि हुने र योभन्दा अगाडि जसरी आज हामी हेलिकोप्टरमा आयौँ । आजभन्दा १०, १५ वर्षअगाडि यहाँ कतिजना हेलिकोप्टरमा उडेर यहाँ आउन सक्ने, क्षमता बनाउन सक्ने मान्छेलाई छान्नुहोस् । नेपाली कांग्रेसको रुख छापमा तपाईंहरूकै गाउँको शेरबहादुर देउवाजीलाई, प्रदेशमा गोविन्द बोहोराजीलाई जिताउनुस्,' उनले भनिन् ।
चुनावीसभामा सम्बोधनका लागि पति देउवासहित आरजु डडेल्धुरामा छिन् । हिजो गृहपालिका गन्यापधुरा गाउँपालिकाको सभालाई सम्बोधन गर्दै उनले हेलिकोप्टरमा उडेर आउने क्षमता बनाउनसक्ने (प्रधानमन्त्री देउवा) व्यक्तिलाई जिताउन आग्रह गरेकी हुन् ।
यसअघि फ्रि भिसामा मलेसिया पठाइदिने, कांग्रेसले जितेको पालिकामा मात्रै बजेट पठाइदिने, डडेल्धुराबासीले बालुवाटारमा सजिलै प्रवेश पाउने भनेर उनी विवादमा परेकी थिइन् ।
