काठमाडौं। अष्ट्रेलियामा अन्तर्राष्ट्रिय विद्यार्थीहरूले दुई हप्तामा ४८ घण्टा काम गर्न पाउने भएका छन्।
अष्ट्रेलियाको शिक्षा मन्त्रालयले एक सूचना जारी गर्दै अन्तर्राष्ट्रिय विद्यार्थीहरूले दुई हप्तामा ४८ घण्टा काम गर्न पाउने जनाएको छ। यसअघि अन्तर्राष्ट्रिय विद्यार्थीहरूले दुई हप्तामा ४० घण्टा मात्रै काम गर्न पाउने नियम थियो।
नयाँ नियम जुलाई १ देखि लागु हुने शिक्षा मन्त्रालयले उल्लेख गरेको छ।
यस्तै अन्तर्राष्ट्रिय विद्यार्थीहरूले स्नातक वा स्नातकोत्तर सकेपछि पूर्णरूपमा काम गर्न पाउनेगरी प्राप्त गर्ने भिसाको समय बढाउन लागिएको छ। हाल विद्यार्थीहरूले पढाइ सकेपछि २ वर्षका लागि भिसा प्राप्त गर्दै आएका छन्।
अब स्नातकोत्तरका विद्यार्थीले ५ वर्ष र विद्यावारिधि तहका विद्यार्थीले ६ वर्ष त्यस्तो भिसा प्राप्त गर्नेछन्।
नयाँ नियमबाट नेपाली विद्यार्थी पनि प्रत्यक्ष लाभान्वित हुनेछन्।
