काठमाडौं। नेपाली राष्ट्रिय क्रिकेट टिमका पूर्व कप्तान सन्दीप लामिछानेलाई यूएई लैजान नेपाल क्रिकेट संघ (क्यान)ले पहल थालेको छ।
नेपालले आईसीसी विश्वकप लिग–२ अन्तर्गत फागुन १५ गतेदेखि २२ गतेसम्म यूएईमा यूएई र पपुवा न्युगिनीसँग शृङ्खला खेल्दैछ। त्यसका लागि नेपाली टिम फागुन १३ गते यूएई भ्रमणमा जानेछ।
तर, अदालतले लामिछानेलाई धरौटीमा रिहा गर्दा विदेश जान नपाइने शर्त राखेको थियो।
उक्त शर्तका कारण सन्दीपले यूएईमा हुने सिरिज गुमाउने भएपछि क्यानले पहल थालेको हो। सन्दीपलाई विदेश लैजानेबारे पहल गरिदिन भन्दै पहल स्वरुप क्यानले राष्ट्रिय खेलकुद परिषद् (राखेप)लाई पत्र पठाएको म्यानेजर विनोद दासले जानकारी दिए।
साथै, सन्दीपको तर्फबाट समेत खेल्न विदेश जान पाउनुपर्ने माग राख्दै सर्वोच्चमा रिट दायर गर्ने तयारी भएको छ।
मंगलबार काठमाडौंमा सम्पन्न भएको त्रिकोणात्मक श्रृंखलामा सन्दीपले उत्कृष्ट प्रदर्शन गर्दै ४ खेलमा १३ विकेट लिएका थिए।
