पोखरा । बहुप्रतिभाशाली गायक, कलाकार तथा पत्रकार सज्जन कुमार सिंहको नयाँ गीत पोखरामा सार्वजनिक भएको छ । ‘पोखरामा दुई कुराको भर हुन्न रे एउटा पानीको अर्को नानीको’ गीतको मूल थेगो रहेको छ ।
पोखराको मौसम जस्तै नानीहरूको भर हुन्न भन्ने भाव प्रति यहाँका केही महिलाले विरोध पनि जनाएका छन् । गीतमा भनिएको छ, ‘एकै छिनमा बादल लाउने एकैछिनमा पानी, पोखराको मौसम जस्तै रैछ तिम्रो बानी ।’
पोखराको मौसम र प्रेमलाई विषयवस्तु बनाएर तयार पारिएको गीतको शब्द, सङ्गीत सज्जनको छ । गीतमा सज्जन र गायिका अस्मिता अधिकारीको स्वर रहेको छ। गीत विनोद बाजुरेलीले एरेन्ज गरेका हुन् ।
बागलुङ घर भएका सज्जन न्युज पोर्टल इलाकाखबर डटकमका सम्पादक/सन्चालक हुन् । उनी प्रेस सेन्टर नेपाल बागलुङका उपाध्यक्ष समेत छन् ।गीतको भिडियोलाई ईश्वर बाबुले निर्देशन र सम्पादन गरेका हुन् ।
राजेश घिमिरेको छायाङ्कन रहेको भिडियोमा गायक सज्जन, जुना गुरुङ र सरिता धनकोटीको अभिनय देख्न सकिन्छ ।भिडियोमा पोखराको फेवाताल र यहाँका पर्यटकीय ठाउँमा छांयाकन गरिएको छ ।
