काठमाडौँ । सुन प्रकरणमा आफूहरुलाई अनावश्यक रुपमा दुःख दिइएको भन्दै त्रिभुवन अन्तर्राष्ट्रिय विमानस्थल भन्सार कार्यालयका कर्मचारीहरु आन्दोलित भएका छन्।
विमानस्थलबाट करिब ६१ किलो सुन बरामद भएको घटनामा अनुसन्धानको नाममा आफूहरुलाई मानसिक रुपमा दुःख दिने काम भएको भन्दै उनीहरु आन्दोलित भएका हुन्। उनीहरुले पाँच बुँदे मागसमेत राखेका छन्।
अनुसन्धानको नाममा निर्दोष कर्मचारीलाई धरपकड गर्ने र पक्राउ गरी हिरासतमा लिनेलगायत काम बन्द गर्नुपर्ने, कार्यस्थलमा नियमित उपस्थित भई निर्भिक रुपमा उच्च मनोबलका साथ कार्य गर्ने वातावरण हुनुपर्ने, बिनाप्रमाण थुनामा राखिएका सबैलाई रिहा गर्नुपर्ने, कर्मचारीको वैयक्तिक विवरण सार्वजनिक गर्ने कार्य तत्काल बन्द गर्न र कर्मचारीलाई दुःख दिने कार्य बन्द गर्नुपर्ने उनीहरुको माग छ।
उनीहरुले सांकेतिक विरोधस्वरुप आज तीन घण्टा पेनडाउनसमेत गरेका छन्। भदौ २५ र २६ गते कार्यालयको कार्गो जाँचपास शाखामार्फत् हुने निकासी, पैठारीसम्बन्धी सम्पूर्ण कार्य पूर्ण रुपमा बन्द गर्ने, भदौ २७ गते यात्रु जाँचपास शाखाबाट सम्पादन हुने कार्यहरु प्रभावित गर्ने उनीहरुले घोषणा गरेका छन्।
