काठमाडाैँ - श्रम, रोजगार तथा सामाजिक सुरक्षा मन्त्री डोलप्रसाद अर्यालले आफूले गलत निर्णय नगर्ने बताएका छन् ।
मंगलबार मन्त्रालयमा आयोजित पत्रकार अन्तक्रिया कार्यक्रममा बोल्दै मन्त्री अर्यालले आफू नागरिकको सेवाका लागि मन्त्रालयको जिम्मेवारीमा आएको भन्दै मन्त्री अर्यालले बरु मन्त्री पद छोड्न तयार रहेको तर गल्ति नगर्ने बताए ।
पूर्वमन्त्री र कर्मचारीको सेटिङमा मन्त्रालयबाट विभिन्न अवैधानिक निर्णय भएको गुनासो सञ्चार माध्यामबाट पाएको भन्दै मन्त्री अर्यालले ति निर्णयमाथि पनि अनुसन्धान हुने बताए । ‘पूर्वनिर्णयहरु राम्रा छन् भने तिनलाई निरन्तरता हुन्छ तर नियतवश गरिएका निर्णयमाथि बरु म मन्त्रालय छोड्न तयार छु तर गलत निर्णय गर्दिनँ,’ मन्त्री अर्यालले भने ।
त्यस्तै उनले वैदेशिक रोजगारीमा रहेका नेपालीलाई समस्या पर्दा समन्वय नगर्ने वैदेशिक रोजगार विभाग र दुतावासलाई समेत कारबाही गर्ने बताए ।
नागरिक ठगिएको गुनासो लिएर सरकारका अंगहरुमा पुग्ने तर तिनिहरुले समस्या समाधान गर्नुको सट्टा थप पीडामा दिने गरेको गुनासो आएको र त्यस्तो भएको पाइएमा निर्मम भएर कारबाही गरिने उनले बताए । ‘नेपालीहरुलाई सहयोग र सहकार्य गर्न उनीहरुको स्थापना गरिएको हो’,मन्त्री अर्यालले भने, ‘यदि तिनै अंगबाट नागरिकलाई असहयोग गरेको पाइए उजुरी गर्नु, हामी तत्काल कारबाही गर्छौँ ।’
भेटघाट कार्यक्रममा पत्रकारका प्रश्नको जवाफ दिँदै मन्त्री अर्यालले वैदेशिक रोजगारीका क्रममा अन्यायमा परेका नेपालीलाई जतिसक्दो छिटो न्याय दिनमा सरकार प्रतिबद्ध रहेको बताएका छन् ।
