काठमाडौं - शिक्षा, विज्ञान तथा प्रविधि मन्त्रालयले वैदेशिक अध्ययन अनुमति पत्र (एनओसी)को तथ्याङ्क मन्त्रालयलाई मात्रै उपलब्ध गराउन निर्देशन दिएको छ ।
एनओसी शाखाका अनुसार मन्त्रालयको उच्च शिक्षा महाशाखाले जारी भएका एनओसीको तथ्याङ्क मन्त्रालयमा पठाउन र तथ्याङ्क माग्नेलाई प्रवक्तामार्फत उपलब्ध गराउने जानकारी गराएको हो ।
केही समयअघि छलफल गर्ने क्रममा शिक्षा मन्त्रालयले जारी गरेको एनओसीको तथ्याङ्क र अध्यागमन विभागको तथ्याङ्क फरक भएको भन्दै मन्त्रालयले यस्तो निर्देशन दिएको जनाएको छ ।
एनओसी प्रमुख नृपध्वज मगरले अनलाइनखबरसँग भने ‘म यहाँ आउनुअघि नै महाशाखाबाट तथ्याङ्क नदिनु भन्ने निर्देशन आएको रहेछ । मन्त्रालयको प्रवक्तामार्फत दिने कुरा रहेछ ।’
शाखाले जारी गरेको एनओसीको तथ्याङ्क र अध्यागमन विभागको तथ्याङ्क फरक हुनु स्वभाविक भएको शाखाको एक कर्मचारी बताउँछन् ।
उनी भन्छन् ‘तथ्याङ्क फरक हुनु स्वभाविक हो । किनभने एनओसी लिएका सबै विद्यार्थी विदेश नै जान्छन् भन्ने हुँदैन, एकै विद्यार्थीले पटक पटक गरेर फरक देशको लागि एनओसी लिएका पनि हुन्छन् ।’
