गोली लागी घाइते भएका स्लोभाकियाका प्रधानमन्त्री रोबर्ट फिको दुई महिनापछि मंगलबार काममा फर्किएका छन् । ५९ वर्षीय फिकोमाथि गत मे १५ मा मध्य स्लोभाकियामा सम्पन्न एक सरकारी बैठकबाट बाहिरिएर कार्यकर्तासँग भेट्ने क्रममा गोली हानिएको थियो । उनको घटनास्थलनजिकैको एक अस्पतालमा दुईवटा लामो शल्यक्रिया गरिएको थियो ।
स्लोभाक मिडियाका अनुसार बन्दुकधारी ७१ वर्षीय कवि जुराज सिन्तुला भएको बताइएको थियो । उनीमाथि आतंकवादको आरोपमा मुद्दा चलाइएको छ । उनी हिरासतमा छन् । फिकोले आफ्नो मध्यमार्गी एसएमइआर–एसडी पार्टी, मध्यमार्गी हलास र ५४ लाख जनताको युरोपेली संघ (इयु) तथा नेटो सदस्यहरूको शासन गर्ने अति दक्षिणपन्थी एनएनएससहितको तीनपक्षीय गठनबन्धनको नेतृत्व गरेका छन् ।
प्रायः हंगेरीका समकक्षी भिक्टर ओर्बनका नजिक मानिने फिकोको युरोपेली संस्थापनले आलोचना गर्छ । राष्ट्रवादी झुकाव भएका फिको पत्रकारहरूबाट बच्न एउटा सुरुङमार्फत मंगलबारको मन्त्रिपरिषद् बैठकमा सहभागी भएको स्लोभाक मिडियाले जनाएका छन् । फेसबुकमा आफ्नो कार्यालयमा रहँदाको एक तस्बिर पोस्ट गर्दै फिकोले लेखेका छन्, ‘प्रिय प्रगतिशील उदारवादी मिडिया र विपक्षीहरू, म बाँचेकोमा क्षमा चाहन्छु । तर पनि फिर्ता भएको छु ।’ गत शरद ऋतुमा फिकोले पदभार ग्रहण गरेपछि सन् २०२२ देखि रुसी आक्रमणको सामना गरिरहेको युक्रेनलाई सैन्य सहायता जारी राख्न स्लोभाकियाले अस्वीकार गरेको थियो ।
फिकोले हंगेरीका ओर्बनजस्तै रुससँग शान्तिवार्ताको वकालत गर्दै आएका छन् । फिको अहिले काममा फर्किएका भए पनि मे ३१ मै अस्पतालबाट डिस्चार्ज भएका थिए । त्हत्याको प्रयासपछि उनी बैसाखीको सहाराले हिँड्न थालेका छन् । उनको तौल पनि स्पष्ट रूपमा घटेको देखिन्छ ।
