बंगलादेशमा अन्तरिम सरकारको प्रमुख बन्न नोबेल पुरस्कार विजेता मुहम्मद युनुस राजधानी ढाका पुगेका छन्। उनी फ्रान्सको पेरिसबाट दुबई हुँदै ढाका आएका हुन्। विद्यार्थीहरूको व्यापक आन्दोलनका कारण प्रधानमन्त्री शेख हसिनाले राजीनामा दिएपछि सेनाले अन्तरिम सरकार बनाउनको लागि युनुसलाई अगाडि सारेको हो। युनुसको नेतृत्वमा बन्ने अन्तरिम सरकारले देशमा स्वतन्त्र र निष्पक्ष चुनाव गराउने तयारी गरेको छ।
स्वागत समारोह
विमानस्थलमा उनलाई स्वागत गर्न बंगलादेशी सेनाका प्रमुख वाकर जमान, आन्दोलनका नेतृत्व गरेका विद्यार्थीहरू, अन्य सुरक्षा निकायका प्रमुख र अन्य उच्च सरकारी अधिकारीहरू पुगेका थिए। विमानस्थलमा पत्रकारहरूले उनलाई ‘कस्तो महसुस भइरहेको छ’ भनेर सोधेका थिए। जवाफमा उनले ‘आफू आभारी रहेको’ बताए।
प्रधानमन्त्री शेख हसिनाको राजीनामा
स्वतन्त्रता सेनानीको परिवारका आफन्तलाई दिइएको आरक्षणविरुद्ध विद्यार्थीले दुई महिनादेखि गरेको आन्दोलनका कारण प्रधानमन्त्री शेख हसिनाले राजीनामा दिँदै देश छाड्नु परेको थियो। यसपछि बंगलादेशी सेनाले अन्तरिम सरकार बनाउन नेतृत्व लिएको थियो।
युनुसको नेतृत्वमा अन्तरिम सरकार
नोबेल पुरस्कार विजेता मुहम्मद युनुसको नेतृत्वमा अन्तरिम सरकार बन्दैछ। उनीसहित १५ सदस्यीय सल्लाहकार परिषद्ले बिहीबार बेलुकी ८ बजे शपथ ग्रहण गर्ने बंगलादेशका सेना प्रमुख जमानले बताएका छन्।
विद्यार्थीहरुको आन्दोलन र युनुसको समर्थन
प्रधानमन्त्री हसिनाले देश छाड्दा युनुस ओलम्पिक कमिटीको निमन्त्रणामा फ्रान्सको पेरिसमा थिए। पेरिसमै भएका बेला विद्यार्थीहरूले स्वतन्त्र चुनाव गराउन उनको नेतृत्वमा अन्तरिम सरकार गठन हुनुपर्ने माग गरेका थिए। विद्यार्थीहरूले सेनाको समर्थन वा सेनाले बनाउने सरकार आफूलाई मान्य नहुने भन्दै युनुसको नेतृत्वमा अन्तरिम सरकार गठनको माग राखेपछि सेना पनि सहमत भएको थियो।
युनुसको बयान
विद्यार्थीहरूले सुरुमा प्रस्ताव राख्दा आफूले नस्वीकारेको युनुसले बताएका थिए। ‘मैले त्यसबेला धेरै काम गर्न बाँकी छ भनेको थिएँ, तर विद्यार्थीहरूले मलाई पटकपटक अनुरोध गरे,’ उनले भनेका थिए, ‘त्यसपछि विद्यार्थीहरूका लागि म जिम्मेवारी लिन तयार भएको थिएँ।’
युनुसको परिचय
८४ वर्षीय युनुस गरिबहरूको बैंकरका रूपमा चिनिन्छन्। गरिबीको रेखामुनि रहेकाहरूलाई लक्षित गरेर उनले ग्रामिण बैंक तथा लघुवित्त स्थापना गरेका थिए। यसका लागि प्राध्यापक समेत रहेका युनुस र त्यहाँको ग्रामिण बैंकलाई सन् २००६ को नोबेल शान्ति पुरस्कार दिइएको थियो।
कानुनी समस्या र समाधान
गएको जनवरीमा बंगलादेशको एउटा अदालतले युनुसलाई देशको श्रम कानून उल्लंघन गरेको भन्दै जेल सजाय सुनाएको थियो। तर, उनले यो आरोप राजनीति प्रेरित भएको भन्दै आलोचना गरेका थिए। अहिले उनलाई अदालतले यो आरोपबाट सफाइ दिइसकेको छ।
