काठमाडौँ— काठमाडौँ महानगरपालिकाका मेयर बालेन शाहले खोलाको अधिकार खोलालाई नै दिनुपर्नेमा जोड दिएका छन्। शुक्रबार टुकुचा खोलामाथि रहेको सडकमा भ्वाङ परेपछि उनले यो विषयमा आफ्नो धारणा सार्वजनिक गरेका हुन्।
अदालती प्रक्रियाले रोकेको खोला खुल्ला गर्ने प्रयास
मेयर शाहले केही समयअघि टुकुचा खोलालाई खुल्ला गर्ने प्रयास गरेको भए पनि अदालती आदेशका कारण महानगरको योजना रोकिएको जानकारी गराए। अदालतको आदेशपछि महानगर केन्द्रीय सरकारको सहयोगको प्रतीक्षामा रहेको उनको भनाइ छ।
सरकारको सहयोगको पर्खाइ
"अदालतको आदेशपछि हामीले टुकुचा खोलाको क्षेत्राधिकार भित्रका व्यक्ति विशेषका नाममा त्रुटिवश गरिएको जग्गा कानूनी प्रक्रिया अनुसार कट्टा गर्न सम्बन्धित मन्त्रालयमा पत्र पठाइसकेका छौँ," मेयर शाहले भने, "सरकारले चाँडो भन्दा चाँडो जग्गा कट्टा गरी उचित क्षतिपूर्ति वा मुअब्जा दिएर खोलाको अधिकार खोलालाई नै सुम्पिने वातावरण बनाउनुपर्छ।"
सरकारले चाँडो कदम उठाउनुपर्ने सुझाव
मेयर शाहले सरकारलाई खोलामाथि बनेका संरचनाको लगत कट्टा गरी उचित क्षतिपूर्ति वा मुअब्जा दिएर खोलालाई खुल्ला गर्ने कार्य तुरुन्त अगाडि बढाउनुपर्ने सुझाव दिए। साथै, उनले "मान्छेले आवश्यकता अनुसार खोलामाथि पुल बनाउनपर्छ, खोलामाथि घर र बाटो होइन," भन्दै आफ्नो स्टाटसमा जोड दिए।
