काठमाडौं - नागरिक उड्डयन प्राधिकरणले सुरक्षा व्यवस्थापन प्रणाली (सेफ्टी म्यानेजमेन्ट सिस्टम, एसएमएस) को न्यून परिपालना दरका कारण दुई हेलिकप्टर कम्पनीको एयर अपरेटर सर्टिफिकेट (एओसी) निलम्बन गर्ने तयारी गरेको छ।
प्राधिकरणले यी कम्पनीहरूलाई उडानमा प्रतिबन्ध लगाउँदै स्पष्टीकरण माग गरेको छ।
अडिटमा न्यून परिपालना दर देखिएपछि कठोर कदम
प्राधिकरणले हाल सबै वायुसेवा कम्पनीहरूको एसएमएस परिपालना दरको अडिट गरिरहेको छ। प्राधिकरणका सूचना अधिकारी ज्ञानेन्द्र भुलका अनुसार, अडिटमा दुईवटा हेलिकप्टर कम्पनीको परिपालना दर ६० प्रतिशतभन्दा कम देखिएपछि उनीहरूको उडानमा रोक लगाइएको हो। एसएमएस अडिटमा देखिएको कमजोरी सुधार्न ७२ घन्टाभित्र एक्सन प्लान पेश गर्न पत्र पठाइएको छ।
एयरलाइन्सहरूका लागि कडाइ
प्राधिकरणले एसएमएस परिपालना दर ६० देखि ७५ प्रतिशत भएका एयरलाइन्सहरूमा पनि कडाइ गर्ने निर्णय गरेको छ। यस्तो दर भएका कम्पनीहरूलाई उडान विस्तारको अनुमति नदिने, स्वीकृत उडानको ५० प्रतिशतभन्दा बढी अनुमति नदिने, र नयाँ जहाज खरिदको अनुमति नदिने निर्णय गरिएको छ।
यो निर्णय नेपालमा उड्डयन सुरक्षाको स्तर सुधार गर्न आइकाओको सेफ्टी रणनीतिअनुसार गरिएको हो।
---2024-09-27T162958.865-1727433921.jpg)
