पोखरामा वार्षिक रुपमा आयोजना हुँदै आएको सांगीतिक कार्यक्रम तथा डान्स पार्टी 'रेन्टरटेनमेन्ट' को छैटौं संस्करण आउँदो शुक्रबार र शनिबार सम्पन्न हुने भएको छ। कार्यक्रमको आयोजना पोखराको लेकसाइडस्थित व्यञ्जन रेस्टुरेन्ट र पामेस्थित दि बिच बारमा हुने कुरा आयोजकले जानकारी दिएका छन्।
मनोरञ्जनका विविध प्याकेजहरू
कार्यक्रमको व्यवस्थापन तथा संयोजन गरिरहेका व्यञ्जन रेस्टुरेन्टका व्यवस्थापक मनोज भट्टले सहभागीहरूले लाइभ म्युजिक, डान्स, फेशन शो, र झरीको फ्युजन जस्ता विविध अनुभवहरू गर्न पाउने जानकारी दिए। कार्यक्रमले आन्तरिक र बाह्य पर्यटकहरूलाई आकर्षित गर्ने विश्वास पनि उनले व्यक्त गरे।
पोखरा र पर्यटकीय प्रवर्द्धन
व्यञ्जन रेस्टुरेन्टका सञ्चालक वैभव पौडेलले पोखराको मौसमलाई ध्यानमा राख्दै यस्तो कार्यक्रम आयोजना गर्न लागिएको बताए। उनले भने, "जुन, जुलाई महिनामा पोखरामा अत्यधिक वर्षा हुने गर्छ, जसका कारण यहाँको पर्यटन सुस्त हुन्छ। पर्यटन प्रवर्द्धनको उद्देश्यले नै हामीले यस्तो कार्यक्रमको आयोजना गरेका हौँ।"
रेन्टरटेनमेन्टको विशेषता
बाराही ग्रुपका कर्पोरेट म्यानेजर राज कुमार केसीले 'रेन्टरटेनमेन्ट' एउटा ब्रान्डको रूपमा स्थापित भएको बताउँदै कार्यक्रममा मोडलहरुलाई ¥याम्पमा उतारिने जानकारी दिए। उनले भने, “समर थिममा मोडलहरूको ¥याम्प शोले कार्यक्रमको ग्ल्यामर अझै बढाउने छ।”
राष्ट्रिय तथा अन्तर्राष्ट्रिय कलाकारहरूको सहभागिता
कार्यक्रममा राष्ट्रिय तथा अन्तर्राष्ट्रिय ख्याति प्राप्त कलाकारहरूको प्रस्तुति रहनेछ। सहभागीहरूले झरीमा रुझ्दै नाचगान र खानपिन गर्ने थिमको यो कार्यक्रमलाई अघिल्ला वर्षहरूमा पनि निकै रुचाइएको थियो। यस कार्यक्रमको लागि पोखरासँगै काठमाडौं, चितवन, बुटवल, धरान, दमौली, भारत, थाइल्याण्ड लगायतका स्थानहरूबाट ‘पार्टी लभर’हरू पोखरा आउने गरेका छन्।
इभेन्ट व्यवस्थापन र सहकार्य
व्यञ्जन र दि बिच बारको संयुक्त आयोजनामा सम्पन्न हुने यस कार्यक्रममा इभेन्ट म्यानेजमेन्टको जिम्मा जक्सन डटले लिएको छ। कार्यक्रमले पोखरामा वर्षेनी झरीको मौसमको छेको पारेर मनोरञ्जनात्मक अनुभव प्रदान गर्ने परम्परालाई निरन्तरता दिनेछ।
