साफ यु-२० च्याम्पियनसिप अन्तर्गत समूह चरणको अन्तिम खेलमा भारतले माल्दिभ्सलाई १-० ले पराजित गर्दै सेमिफाइनलमा प्रवेश गरेको छ। यो जितसँगै भारत समूह बी को विजेताको रुपमा अगाडि बढेको हो।
मंग्लेनथाङ किपगेनको निर्णायक गोल
खेलको इन्जुरी टाइमको पाँचौं मिनेटमा भारतका मंग्लेनथाङ किपगेनले निर्णायक गोल गर्दै भारतलाई महत्वपूर्ण जित दिलाए। लगातार दुई खेल जित्दै भारतले ६ अंक जोड्दै समूह बी को शीर्ष स्थानमा पुगेको छ।
भुटान उपविजेता, माल्दिभ्स बाहिरियो
भारतले माल्दिभ्सलाई पराजित गरेपछि भुटान समूह बी को उपविजेता बन्दै सेमिफाइनलमा प्रवेश गरेको छ। माल्दिभ्स भने दुई खेलमा पराजित हुँदै अंकविहीन भएर प्रतियोगिताबाट बाहिरिएको छ।
नेपाल र बंगलादेश पनि सेमिफाइनलमा
यसअघि नै समूह ए बाट नेपाल र बंगलादेशले सेमिफाइनलमा स्थान बनाइसकेका छन्। नेपालले आफ्नो समूहमा दुई खेल जित्दै विजेताको रुपमा सेमिफाइनलमा प्रवेश गरेको हो भने बंगलादेश उपविजेताको रुपमा अगाडि बढेको छ।
