शनिबार राति परेको मुसलधारे वर्षाले म्याग्दी जिल्लाको बेनीबजार र आसपासका क्षेत्रहरूमा ठूलो क्षति पुर्याएको छ। बाढीका कारण विद्यालयहरू, ज्येष्ठ नागरिक आश्रम, सडक, र अन्य भौतिक संरचनाहरूमा ठूलो क्षति भएको छ।
बाढीले गर्दा क्षति
बागलुङ–बेनी सडक अन्तर्गत बेनी नगरपालिका–१ हुलाकेको खोल्सामा बग्ने बाढीले ग२च ९३५५ नम्बरको बोलेरो जिपलाई बगाएको छ। यात्रु र चालकले भने भागेर आफ्नो ज्यान जोगाउन सफल भएका छन्। बेनी नगरपालिका–९ मा रहेको जडभरत संस्कृत माध्यमिक विद्यालयको पाँचकोठे भवनमा बाढी पसेर कक्षाकोठा पुरिएको छ।
सशस्त्र प्रहरी बल आश्रित गुल्म गलेश्वरका प्रहरी नायब उपरीक्षक नवराज नेपालका अनुसार, बाढीले पुलहपुलत्स्य अन्नक्षेत्र र गलेश्वर ज्येष्ठ नागरिक आश्रमको भोजनालयमा समेत क्षति पुर्याएको छ। राति नै बाढीबाट जोगिएका सशस्त्र प्रहरी र स्थानीयवासीले बिहानैदेखि कक्षाकोठा र भोजनालयमा पसेको बाढी पन्छाउने कार्यमा जुटेका छन्।
यातायात अवरुद्ध
बाढी र पहिरोका कारण म्याग्दीका प्रमुख सडकहरू अवरुद्ध भएका छन्। बागलुङ–बेनी सडक, बेनी–जोमसोम सडक, बेनी–दरबाङ सडक, र मालढुङ्गा–बेनी सडक बिभिन्न ठाउँहरूमा पहिरोले अवरुद्ध भएको छ। यस कारण जिल्ला सदरमुकाम बेनीदेखि ग्रामीण क्षेत्रहरू, छिमेकी जिल्ला बागलुङ, पर्वत, र मुस्ताङसँगको यातायात सम्पर्क विच्छेद भएको छ।
सम्बन्धित स्थानीय तह, पूर्वाधार विकास कार्यालय, र बेनी–जोमसोम–कोरला सडक आयोजनामार्फत पहिरो पन्छाउने र सडक मर्मतका लागि समन्वय भइरहेको छ।
