नेपाली "सिक्रेट सुपरस्टार" भनेर चिनिने विष्णु माझीको नयाँ तीज गीत ‘आइन आमा यो तीजमा’ २४ घण्टामा सबैभन्दा धेरै हेरिने नेपाली भाषाको गीत बनेको छ।
यस गीतलाई रिलिज भएको एकै दिनमा १५ लाखभन्दा बढी पटक हेरिएको थियो। समाचार तयार पार्दासम्म (११ः०६ बजे) गीतलाई १६ लाखभन्दा बढी पटक हेरिएको छ, र यो ट्रेन्डलाई ध्यानमा राख्दा दोस्रो दिन आइतबारसम्म गीतले २० लाख भ्यूज पार गर्न सक्ने सम्भावना देखिन्छ।
युट्युवमा शानदार प्रतिक्रिया
शनिबार बिहान ‘सपना म्युजिक इन्डष्ट्रिज’ नामक युट्युव च्यानलबाट रिलिज गरिएको यो गीतलाई युट्युवमा झण्डै १५ हजार प्रतिक्रिया प्राप्त भएका छन्। यस गीतलाई १ लाख २५ हजारभन्दा बढी लाइक पनि मिलिसकेको छ।
टिकटक र रिल्समा प्रभाव
तीन दिनअघि सरकारले टिकटकलाई खुला गरेपछि विष्णु माझीको नयाँ गीतले थप लोकप्रियता प्राप्त गरेको देखिन्छ। टिकटक र रिल्समा यो गीतमा आधारित धेरै भिडियोहरू बनेका छन्, जसले गीतको पहुँचलाई थप वृद्धि गरेको छ।
गीतको निर्माण र लोकप्रियता
यो गीतमा माझीका श्रीमान सुन्दरमणी अधिकारीको शब्द तथा संगीत छ भने आशिष अविरलको एरेन्ज छ। भिडियोमा ललिता पौडेल फिचर्ड हुँदा माझीको पाश्र्वगायनले गीतलाई जीवन्तता दिएको छ। माझीको अघिल्लो गीत ‘चरी जेलैमा’ले पनि दुई सातामा १ करोड भ्यूज प्राप्त गरेको थियो।
नेपाली गीतको भ्यूज रेकर्ड
छोटो समयमा करोड क्लबमा पुग्ने गीतमा प्रकाश सपुतको ‘सकम्बरी’ प्रमुख छ, जसले एक सातामा करोड भ्यूज प्राप्त गरेको थियो। यसैगरी, फिल्म ‘छक्कापञ्जा’ श्रृंखलाका केही गीतले पनि २४ घण्टामा ९/१० लाख भ्यूज पाएका थिए।
विष्णु माझीको यस नयाँ तीज गीतले नेपाली गीत-संगीतमा नयाँ मापदण्ड तय गरेको छ।
