भारतको बिहार राज्यको समस्तीपुर जिल्लामा नेपाली यात्रुहरूसवार बस दुर्घटनामा परेको छ। शनिबार राति भएको यस दुर्घटनामा कम्तीमा ३० भन्दा बढी नेपाली यात्रुहरू घाइते भएका छन्।
बसलाई ट्रकले दिएको ठक्कर
४३ जना सवार ना ७ ख ६४४६ नम्बरको बसलाई पछाडिबाट आएको ट्रकले ठक्कर दिएको थियो। ठक्करका कारण बस अनियन्त्रित भएर सडक किनारमा पल्टिएको भारतीय सञ्चार माध्यमहरूले जनाएका छन्।
घाइतेहरूको अवस्था
दुर्घटनामा तीन दर्जन यात्रु घाइते भएका छन्, जसमा एक किशोरसहित पाँच जनाको अवस्था गम्भीर रहेको बताइएको छ। घाइतेहरूको उपचार मुसरीघरारी अस्पताल र केही निजी क्लिनिकहरूमा भइरहेको छ।
बसको उद्दार र ट्रक नियन्त्रणमा
पल्टिएको बसलाई क्रेनको सहायताले उठाइएको छ, र ठक्कर दिने ट्रकलाई नियन्त्रणमा लिएर दुर्घटनाबारे अनुसन्धान भइरहेको भारतीय प्रहरीले जनाएको छ।
यात्रुको विवरण
एसएपी सञ्जय पाण्डेका अनुसार, दुर्घटनामा परेका घाइतेहरू नेपालका बारा जिल्लाका बासिन्दा हुन्। उनीहरू झारखण्डको देवघर तीर्थका लागि जल चढाउन जाँदै गर्दा दुर्घटनामा परेको बताइएको छ। यद्यपि, बाराका प्रमुख जिल्ला अधिकारी शशिधर घिमिरेले घटनाबारे आफूलाई जानकारी नभएको बताएका छन्।
