जल तथा मौसम विज्ञान विभागद्वारा सोमबार जारी मौसम बुलेटिनअनुसार हाल देशभर आंशिकदेखि साधारणतया बदली भएको छ। कोशी र लुम्बिनी प्रदेशका एक–दुई स्थानमा मेघगर्जन र चट्याङसहित हल्का वर्षा भइरहेको छ।
दिउँसोको मौसम: वर्षाको सम्भावना
आज दिउँसो देशभर आंशिकदेखि साधारणतया बदली रहनेछ। सातै प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। विशेष गरी कोशी प्रदेशको पहाडी भूभागमा भारी वर्षाको सम्भावना रहेको बताइएको छ।
रातिको मौसम: बदली र वर्षाको सम्भावना
आज राति कोशी, मधेश, वाग्मती, र गण्डकी प्रदेशलगायत देशको पहाडी भागमा आंशिकदेखि साधारणतया बदली रहनेछ। बाँकी भागमा आंशिक बदलीदेखि मुख्यतया सफा रहने अपेक्षा गरिएको छ।
जोखिम र सतर्कता
कोशी प्रदेशको पहाडी भूभागमा भारी वर्षाको सम्भावना रहेकाले विभागले गेग्रान बहाव, बाढी, पहिरो तथा भूक्षयको जोखिमबारे सचेत गराएको छ। यसले ती क्षेत्रमा दैनिक जनजीवन, कृषि, स्वास्थ्य, पर्यटन, पर्वतारोहण, सडक, र हवाई यातायातमा आंशिक असर पर्ने सम्भावना रहेको हुँदा आवश्यक सतर्कता अपनाउन अनुरोध गरिएको छ।
