काठमाडौँ— प्रधानमन्त्री केपी शर्मा ओलीले वर्तमान सरकारले सत्ता स्वार्थको लागि कसैमाथि अन्याय नगर्ने प्रतिबद्धता व्यक्त गरेका छन्। शनिबार क्याप्टेन रामेश्वर थापाद्वारा लिखित ‘इन टु द फायर’ पुस्तक लोकार्पण समारोहमा बोल्दै, उनले समाजलाई थिति र विधिबाट चलाउनुपर्ने भन्दै कसैमाथि अन्यायपूर्ण तरिकाले अत्याचार नगर्ने बताएका हुन्।
अन्याय र कानुनको पालना
प्रधानमन्त्री ओलीले भने, “अन्याय कसैमाथि हुनु हुँदैन। तर समाजलाई थिति र विधिबाट चलाउनु पर्छ। कानुनको राज हुनुपर्छ। म के स्पष्ट पार्न चाहन्छु भने अहिलेको सरकारले कुनै कसैमाथि अन्यायपूर्ण तरिकाले आफ्नो हित, सत्ता स्वार्थलाई केन्द्रमा राखेर अन्याय अत्याचार गर्दैन।”
प्रचण्डको उपदेशमा प्रतिक्रिया
ओलीले पुष्पकमल दाहाल प्रचण्डले श्रीलंका र बंगलादेशबाट केही कुराहरू सिक्नुपर्ने उपदेश दिएको भन्दै आफूले कुनै गलत काम नगरेको स्पष्ट पारे। उनले भने, “प्रचण्डजीले श्रीलंका र बंगलादेशबाट सिक भनेर उपदेश दिनुभएछ। मैले १७ हजार मान्छे मारेको छु र खुट्टा कमाउने? लुटपाट गरेको छु र? जसले चर्को स्वरमा सिक सिक भनिरहेको छ राम्रो तरिकाले आफैँ सिक्नलाई आग्रह गर्दछु। नेपाल कुनै देशको फोटोकपी गर्ने देश होइन। यहाँ आफ्नै इतिहास र परम्परा छ।”
राजनीति र राज्य व्यवस्थामा विश्वास
प्रधानमन्त्री ओलीले राजनीति र राज्य व्यवस्थालाई घृणा गर्नु भनेको सामाजिक अराजकता मात्र भएको उल्लेख गर्दै, यसले समाजलाई कुनै राम्रो परिणाम नदिने बताए। उनले भने, “राजनीति र राज्य व्यवस्थालाई घृणा गर्ने, विधिको शासनलाई घृणा गर्ने भनेको सामाजिक अराजकता मात्र हो। यसले समाजलाई कुनै राम्रो परिणाममा पुर्याउँदैन। घृणाको राजनीति, अराजकता अथवा संस्कारहीन तरिका जस्ता कुराहरूले समाजलाई बेथितितर्फ लान्छ।”
राजनीति: समाजलाई बाँध्ने सूत्र
ओलीले सबै जाति, भाषाका जनतालाई एउटै सूत्रमा बाँध्ने भनेको राजनीति नै भएको स्पष्ट पारे। उनका अनुसार राजनीति समाजलाई एकताबद्ध गर्न र समृद्धितर्फ उन्मुख गराउन महत्त्वपूर्ण माध्यम हो।
