आइतबार सेयर बजारमा गिरावट आएको छ। नेप्से परिसूचक ५३.६३ अंकले घटेर २६९५.९३ विन्दुमा आइपुगेको छ। यो गिरावटसँगै नेप्सेले उच्च बन्द विन्दु ३००१ बाट ३०५ अंक गुमाइसकेको छ।
२७ सय विन्दुको मनोवैज्ञानिक प्रभाव
अन्तरदिनको कारोबारमा २७ सय विन्दुबाट तल आउने प्रयास पटक–पटक कमजोर भए पनि बजार बन्द हुँदा भने केहि तल आइपुग्यो। अहिले पनि २७ सयको विन्दु लगानीकर्ताको मनोवैज्ञानिक विन्दुमा रहेको देखिन्छ।
कारोबार रकममा कमी
यसदिन कारोबार रकममा पनि कमी आएको छ। बिहीबार १२ अर्ब २४ करोड रूपैयाँको सेयर कारोबार भएकोमा आइतबार १० अर्ब ५१ करोड रूपैयाँको मात्र कारोबार भएको छ। अघिल्लो दिनको तुलनामा कारोबार रकममा १ अर्ब ७३ करोड रूपैयाँको कमी आएको हो।
कम्पनीहरूको सेयर मूल्यको अवस्था
आइतबार ३१ कम्पनीको सेयर मूल्य बढेको छ भने २०९ कम्पनीको सेयर मूल्य घटेको छ। चार कम्पनीको सेयर मूल्य स्थिर रहेको छ।
सर्वाधिक वृद्धि र गिरावट भएका कम्पनीहरू
यसदिन सुपर माइ हाइड्रोपावरको सेयर मूल्य सर्वाधिक १० प्रतिशतले बढेर प्रतिकित्ता मूल्य १,०५६ रूपैयाँ कायम भएको छ। हिमालयन पावर पार्टनरको मूल्य ९.८७ प्रतिशतले बढेर ४२३ रूपैयाँ पुगेको छ।
यस्तै, पिप्ल्स हाइड्रोपावर र माइ खोला हाइड्रोपावरको सेयर मूल्य सर्वाधिक १० प्रतिशतले घटेर क्रमशः ४०६ रूपैयाँ ८० पैसा र ६१२ रूपैयाँमा झरेको छ। थ्री स्टार हाइड्रोपावरको सेयर मूल्य ९.९९ प्रतिशतले घटेर १,९९७ रूपैयाँ २० पैसा कायम भएको छ।
सर्वाधिक कारोबार भएको कम्पनी
गुडविल फाइनान्सको प्रतिकित्ता मूल्य १,२३० रूपैयाँमा ५२ करोड ३१ लाख रूपैयाँ बराबरको सेयर कारोबार भएको छ। यो मूल्य अघिल्लो दिनको तुलनामा ४.४१ प्रतिशतले वृद्धि भएको हो। सर्वाधिक सेयर खरिद–बिक्री हुने दोस्रो कम्पनीमा हिमालयन रिइन्स्योरेन्स रहेको छ, जसको प्रतिकित्ता ८६१ रूपैयाँमा ३३ करोड ४३ लाख रूपैयाँको सेयर कारोबार भएको छ।
समूहगत परिसूचकको स्थिति
आइतबार कारोबारमा आएका १३ वटा समूहगत परिसूचकमध्ये म्युचुअल फण्ड समूहको परिसूचक ०.८० प्रतिशतले बढेको छ भने बाँकी १२ समूहको परिसूचक घट्दा समग्र नेप्से घटेको हो। यसदिन वित्त समूहको परिसूचक सर्वाधिक ३.४४ प्रतिशतले घटेको छ भने दोस्रोमा होटल्स तथा पर्यटन समूहको परिसूचक २.९८ प्रतिशतले घटेको छ।
