काठमाडौं - प्रहरीले सहकारी ठगी प्रकरणमा मुछिएका व्यक्तिहरुसँग बयान लिने प्रक्रिया तीव्र बनाएको छ। काठमाडौंस्थित सरकारी कार्यालयमा ८ भदौमा आचार्य, जोशी र पुनको बयान लिइएको छ। यसअघि ७ भदौमा संसदीय विशेष समितिले लामिछानेसँग ९ घण्टासम्म बयान लिएको थियो।
सहकारीको रकमबारे अनभिज्ञता दाबी
प्रहरीसँगको बयानमा लामिछानेले सहकारीको रकमबारे आफूलाई कुनै जानकारी नभएको दाबी गरेका छन्। उनले भने, “सहकारीको रकमबारे मलाई केही थाहा छैन। मलाई थाहै नदिई कसले मेरो नाममा के गर्यो त्यो थाहा हुने विषय पनि भएन। कम्पनीबाट अलग भइसकेकाले त्यहाँको आर्थिक कारोबारको पाटोमा म जानकारी छैन।”
कास्कीबाट काठमाडौं आएको छानबिन टोली
लामिछानेसहितका आरोपितहरुसँग बयान लिन कास्कीबाट डीएसपी वसन्तकुमार शर्माको नेतृत्वमा तीन जनाको छानबिन टोली काठमाडौं आएको थियो। उक्त टोलीले गोर्खा मिडिया नेटवर्क, नेचर हब्र्स, र नेचर नेस्ट इन्टरनेशनलको कार्यालयमा छापा मारी खानतलासी गरेको थियो। तर, महत्वपूर्ण कागजात फेला नपरेको प्रहरी स्रोतले जनाएको छ।
सहकारी ठगीमा मुछिएका अन्य व्यक्तिहरुसँगको बयान
सहकारी ठगी प्रकरणमा मुछिएका दीपेश पुन र आचार्य लगायतका व्यक्तिहरुसँग पनि प्रहरीले बयान लिएको छ। आचार्य रास्वपाका सहमहामन्त्रीसमेत रहेका छन् भने पुन पूर्वउपराष्ट्रपति नन्दकिशोर पुनका छोरा हुन्। सहकारीको रकम गोर्खा मिडिया नेटवर्कमा गएको पाइएको छ।
संसदीय छानबिन समितिको प्रतिवेदन कुर्दै प्रहरी
प्रहरीले हालसम्मका बयान र छानबिनको आधारमा मुद्दा प्रक्रिया अघि बढाउने तयारी गरे पनि संसदीय छानबिन समितिको प्रतिवेदन कुर्दै बसेको छ। समितिले थप १५ दिनको म्याद पाएको छ, जसका कारण मुद्दा प्रक्रिया असोज महिनापछि मात्रै अघि बढ्ने देखिन्छ।
थप २५ जनाविरुद्ध पक्राउ पूर्जी जारी
सहकारी ठगी प्रकरणमा थप २५ जनाविरुद्ध पक्राउ पूर्जी जारी गरिएको छ। यसअघि १९ जनाविरुद्ध मुद्दा चलाइएको थियो भने अहिले पूर्जी जारी भएकासँगै पक्राउ परिने व्यक्तिहरुको संख्या ४४ पुगेको छ।
लामिछानेको राजनीतिक चुनौती
सहकारी छानबिन प्रक्रियासँग असन्तुष्ट लामिछानेले यसलाई राजनीतिक रङ दिने प्रयास गरेका छन्। उनले आफूविरुद्ध षड्यन्त्र भइरहेको भन्दै सरकारलाई चुनौती दिएका छन्। लामिछानेले जनआन्दोलनको चेतावनीसमेत दिएका छन्, जसलाई राज्यको अनुसन्धान प्रभावित पार्ने उद्देश्यले आएको भनी विश्लेषण भइरहेको छ।
