बागलुङ - लगातारको अविरल वर्षाका कारण मध्यपहाडी लोकमार्गको विभिन्न खण्डमा पहिरो खसेर सडक अवरुद्ध भएको छ।
निसीखोला गाउँपालिकाको खाडुखोला, जिरीखोला, कालापैराखोला, बडिगाड गाउँपालिकाको ठूलाखेतलगायतका स्थानमा पहिरो खसेको हो, जसका कारण यातायात ठप्प भएको छ।
बागलुङ–रुकुम खण्डमा यातायात पूर्ण रूपमा ठप्प
लोकमार्गअन्तर्गत बागलुङको बुर्तिबाङ–पूर्वी रुकुम खण्ड र बागलुङ–बुर्तिबाङ खण्ड पूर्ण रूपमा अवरुद्ध हुँदा सयौँ यात्रु अलपत्र परेका छन्। निसीखोला–४ का वडाध्यक्ष टीकानिधी पौडेलका अनुसार, पहिरोका कारण यात्रा गर्ने यात्रुहरू बीच बाटोमै रोकिएका छन्।
यात्रुहरू अलपत्र, तीज मनाउन फर्किएका गाउँले समस्यामा
लोकमार्ग अवरुद्ध हुँदा निसीखोला, पूर्वी रुकुम, जाजरकोट, रोल्पादेखि पोखरा, काठमाडौं जाने यात्रुहरू बाटोमा अलपत्र परेका छन्। यसैगरी, तीज पर्व मनाउन काठमाडौँ, पोखरा, चितवन, बुटवललगायत ठाउँबाट गाउँ फर्किएका मानिसहरू पनि समस्यामा परेका छन्।
रात्रि बसहरू बुर्तिबाङमै रोकिएका
काठमाडौँबाट पूर्वी रुकुम र जाजरकोटका लागि छुटेका रात्रि बसहरू बुर्तिबाङमै रोकिएका छन्। वडाध्यक्ष पौडेलका अनुसार, निरन्तर वर्षा भइरहेको हुँदा सडक खुलाउन समय लाग्नेछ। उनले भने, ‘रातिदेखि ठूलो वर्षा भइरहेको छ र धेरै ठाउँमा पहिरो जाँदा यातायात ठप्प भएको छ। वर्षा रोकिएपछि मात्र सडक खुलाउन सकिनेछ।’
ठाडो खोलामा बाढी, पहिरोका कारण अवरुद्ध
साना ठाडोखोलाहरूमा ठूलो बाढी आएकोले पनि लोकमार्गको धेरै ठाउँ अवरुद्ध भएको छ। अहिले निरन्तरको वर्षाले पहिरोको अवस्था झनै जटिल बनेको छ, जसले गर्दा सवारी सञ्चालनमा समस्या परेको छ।
