लस एञ्जलस – हलिउडका चर्चित अभिनेता तथा भ्वाइस आर्टिष्ट जेम्स अर्ल जोन्सको ९३ वर्षको उमेरमा सोमबार निधन भएको छ। जोन्स आफ्नो सशक्त आवाज र अभिनयका लागि विश्वभर चर्चित थिए। उनले "स्टार वार्स" का सुपरभिलेन डार्थ भाडर र "लायन किंग" का मुफासा जस्ता प्रतिष्ठित पात्रहरूलाई आवाज दिएका थिए।
निधनको पुष्टि
जोन्सको निधनको पुष्टि गर्दै उनका एजेन्ट बेरी म्याकफेर्सनले सोमबार बिहान उनको मृत्यु भएको जानकारी दिएका छन्। जोन्सले आफ्नो करियरमा "फिल्ड अफ ड्रिम्स," "कमिङ टू अमेरिका," "कोनन द बार्बेरियन," र "लायन किंग" जस्ता चर्चित फिल्महरूमा अभिनय गरेका थिए।
डार्थ भाडरका लागि चर्चित
जेम्स अर्ल जोन्स विशेषतः "स्टार वार्स" फिल्म सिरिजमा डार्थ भाडरको आवाजका लागि प्रख्यात थिए। उनको मृत्युको खबरपछि "स्टार वार्स" मा भाडरको छोरा ल्यूक स्काईवाकरको भूमिका निर्वाह गरेका अभिनेता मार्क हमिलले आफ्नो इन्ष्टाग्राममा ‘रिप ड्याड’ भन्दै श्रद्धाञ्जली दिएका छन्।
जोन्सको अभिनय करियर
जोन्सले आफ्नो लामो अभिनय करियरमा तीन वटा टोनी अवार्ड, दुई एमी अवार्ड र एक ग्रामी अवार्ड जितेका थिए। सन् २०११ मा उनलाई ओस्करले लाइफटाइम अचिभमेन्ट अवार्डले सम्मानित गरेको थियो। उनको निधनपछि हलिउडका कलाकारहरूले एकपछि अर्को गर्दै उनलाई श्रद्धाञ्जली दिइरहेका छन्।
