बझाङ — बझाङको जयपृथ्वी राजमार्गमा बिहीबार बिहान पाँच बजेदेखि पहिरो जाँदा सडक अवरुद्ध भएको छ। तमैल बजारनजिकै जालेबगरमा पहिरो झरेपछि राजमार्ग अवरुद्ध भएको हो।
सवारी आवागमन ठप्प
सडक अवरुद्ध भएपछि बझाङ जिल्लाबाट छुट्ने र भित्रिने लामो तथा छोटो दूरीका सवारी साधनहरु चल्न सकेका छैनन्। पहिरोका कारण धनगढी, काठमाडौं, महेन्द्रनगर, डडेल्धुरा जाँदै गरेका गाडीहरू रोकिएका छन् भने बझाङ भित्रिने सवारी साधन पनि अवरुद्ध भएका छन्।
पहिरो हटाउन कठिनाइ
सडक खुलाउन एक्स्काभेटर पठाइएको भए पनि लगातार पहिरो झरिरहेकाले काममा कठिनाइ भइरहेको प्रहरीले जानकारी दिएको छ। अवरुद्ध सडक पुनः सञ्चालनमा ल्याउन प्रयास जारी छ, तर निरन्तर पहिरोका कारण काम प्रभावित भइरहेको छ।
