चितवनको मुग्लिन–नारायणगढ सडकखण्डको सिमलताल भन्ने ठाउँबाट त्रिशूली नदी किनारमा खसेको भेटिएको ट्रकको दुर्घटना शंकास्पद देखिएको प्रहरीको भनाइ छ।
डीएसपी भेषराज रिजालका अनुसार आज बिहान ना ६ ख ६२८३ नम्बरको ट्रक त्रिशूली नदी किनारमा खसेको अवस्थामा भेटिएको हो। तर, ट्रकका चालक र सहचालक हालसम्म सम्पर्कविहीन रहेका छन्। प्रहरी शंकास्पद दुर्घटनाका रूपमा अनुसन्धान गर्दै चालक र सहचालकको खोजी गरिरहेको छ।
राति सिमलतालमा रोकिएको ट्रक
प्रहरीका अनुसार ट्रक भैरहवाबाट सनफ्लावर (सूर्यमुखी) तेल लोड गरेर ललितपुरतर्फ गइरहेको थियो। डीएसपी रिजालले बताएअनुसार, राति करिब ८ बजे ट्रक सिमलतालनेर रोकिएको देखिएको थियो। उक्त ट्रक थोरै अघि बढेपछि दुर्घटना भएको देखिन्छ।
आधा तेल बेपत्ता, दुर्घटना शंकास्पद
ट्रकमा २ हजार २२५ कार्टुन सूर्यमुखी तेल लोड गरिएको थियो, तर दुर्घटनास्थलमा आधा जति तेल हराइरहेको छ। तेल पोखिएको वा खसेको कुनै निशान नदेखिएकाले प्रहरी शंकास्पद मान्दै अनुसन्धानमा जुटेको छ।
चालक र सहचालकको खोजी जारी
चालक र सहचालकको मोबाइल स्विच्डअफ अवस्थामा रहेको छ। उनीहरू त्रिशूली नदीमा डुबेको कुनै संकेत नभएकाले प्रहरीले खोजी कार्यलाई गम्भीरताका साथ अघि बढाइरहेको छ।
