काठमाडौं - ९० को दशकदेखि युवाहरूको मनमा राज गर्न सफल बलिउड सुपरस्टार लकी अली आज ६५ वर्षका भए।
आफ्नो अद्वितीय आवाजले सबैको दिल जितेका लकी अलीले आजसम्म तीनवटा विवाह गरेका छन् र पाँच सन्तानका पिता पनि हुन्। तर, आज पनि उनी एक्लै जीवन बिताइरहेका छन्।
तीनवटा विबाह र पाँच सन्तान
लकी अलीले १९९६ मा पहिलोपटक अभिनेत्री मेघन जेनसँग विवाह गरेका थिए। "सुनो" गीतको क्रममा भेट भएको यो जोडीको विवाह लामो समय टिक्न सकेन र उनीहरू छुट्टिए। चार वर्षपछि उनले पर्शियन महिला अनाहितासँग दोस्रो विवाह गरे। तर, यो सम्बन्ध पनि लामो समय टिक्न सकेन र उनीहरू छुट्टिए।
यसपछि, लकी अली केही वर्षसम्म एक्लै जीवन बिताए। तेस्रो पटक उनी ब्रिटिश मोडल केट एलिजाबेथसँग प्रेममा परे र विवाह गरे। केट एलिजाबेथ, लकी अलीभन्दा २५ वर्ष कान्छी थिइन्। यो विवाह पनि केही वर्षमै टुट्यो र २०१७ मा केटले लकी अलीलाई अलविदा भनिन्। त्यसपछि, लकी अली एक्लै जीवन बिताइरहेका छन्। उनी पाँच सन्तानका पिता हुन्।
संगीत र अभिनयमा अद्वितीय योगदान
लकी अलीले बलिउडमा "एक पल का जीना" गीतबाट ठूलो चर्चा पाएका थिए। उनको गायन शैली यति धेरै प्रिय भयो कि उनको फ्यानहरूको संख्या दिनानुदिन बढ्दै गयो। "सुर" फिल्मको "आ भी जा" गीत पनि निकै लोकप्रिय बन्यो। उनले "बचना ए हसीनों", "अंजाना अंजानी", र "तमाशा" जस्ता फिल्महरूमा गीत गाएका छन्।
सिर्फ गायक मात्र नभई, लकी अलीले अभिनयमा पनि आफ्नो छाप छोडेका छन्। उनले "हमारे तुम्हारे", "त्रिकाल", र "काँटे" जस्ता फिल्महरूमा अभिनय गरेका छन्। उनले टिभी सिरियल "भारत एक खोज"मा पनि अभिनय गरेर दर्शकको मन जितेका छन्।
अहिलेको जीवनशैली
आजको दिनसम्म पनि, लकी अली एक्लै आफ्नो ब्यान्डका साथ देश-विदेशमा संगीतको महफिलहरूमा आफ्नो आवाजको जादू देखाइरहेका छन्। लकी अलीको गायकी आज पनि उस्तै लोकप्रिय छ र उनी आफ्नो संगीतमार्फत् सधैं दर्शकको मनमा रहन्छन्।
