बागलुङ - सहकारी अपचलनको आरोपमा फरार रहेका ढोरपाटन नगरपालिकाका मेयर देवकुमार नेपालीले हुलाकमार्फत संसदीय छानबिन विशेष समितिलाई पत्र पठाएका छन्।
रकम फिर्ता गर्नको लागि वातावरण बनाउन आग्रह
पत्रमा नेपालीले इमेज सहकारी कास्कीका संस्थापक अध्यक्षको हैसियतले सहकारीको बाँकी १ अर्ब ८० करोड रुपैयाँ फिर्ता गर्न वातावरण बनाउन आग्रह गरेका छन्। उनले तीन अर्बभन्दा बढीको चलअचल सम्पत्ति रहेको र त्यसलाई बिक्री गरी बाँकी रकम फिर्ता गर्न सकिने बताएका छन्।
मुद्दा फिर्ता लिएर सम्पत्ति बेच्न अनुमति दिन आग्रह
नेपालीले पत्रमा आफ्ना साथै परिवारका सदस्यहरू र सहकारी सञ्चालक समितिका सदस्यहरूमाथि लागेको मुद्दा फिर्ता लिएर श्रीमतीको नाममा रहेको सम्पत्ति स्वतन्त्र रूपमा बेच्न अनुमति दिन अनुरोध गरेका छन्। उनले यस कदमबाट बैंक र बचतकर्ताहरूको हिसाब मिलान गरी आफ्नो सार्वजनिक जीवनमा पुनः फर्किनका लागि सहयोग गर्न समितिसँग विनम्र अनुरोध गरेका छन्।
सम्पत्ति विवरण
पत्रमा नेपालीले आफ्नो र श्रीमतीको नाममा रहेको घर, जग्गा, लालपुर्जा, सहकारी संघर्ष समितिसँग भएका लिखित सम्झौताहरू, बचतकर्ताहरूलाई फिर्ता गर्नुपर्ने रकम, बैंकबाट लिएका ऋणहरू, र रोक्का गरिएका सम्पत्ति विवरणहरू समावेश गरेका छन्।
