काठमाडौं - अखिल क्रान्तिकारीको २३औं महाधिवेशनको दोस्रो दिनको लागि तोकिएको कार्यसूची कार्यान्वयन हुन सकेको छैन।
आजको महाधिवेशनको मुख्य कार्यसूची विधानमा छलफल गर्ने थियो। बिहान ८ बजे कार्यालय बैठक र ९ बजेका लागि विधान पेश गर्ने योजना भए पनि त्यसमा अवरोध आएको छ। कुनै पनि कार्यसूचीमा प्रवेश गर्न नसकेकोले महाधिवेशनको तालिका प्रभावित भएको उपाध्यक्ष क्षितिज सापकोटाले बताए।
विवादित प्रतिनिधिको टुंगो नलाग्दा ढिलाइ
महाधिवेशनको अर्को महत्त्वपूर्ण कार्यसूची विवादित प्रतिनिधिहरूको टुंगो लगाउने थियो। यसमा पनि खास प्रगति हुन नसक्दा विधान छलफल जस्ता महत्वपूर्ण कार्यहरू अघाडि बढ्न सकेका छैनन्।
वर्षाले महाधिवेशनलाई थप प्रभावित
मौसमको प्रतिकूलता पनि महाधिवेशनको कामलाई प्रभावित गर्ने अर्को कारण बनेको छ। वर्षाका कारण कतिपय प्रतिनिधिहरू हलसम्म आइपुग्न सकेका छैनन्, जसले गर्दा महाधिवेशनको कार्यतालिका ठप्प परेको छ।
नेतृत्व चयनको प्रतिस्पर्धाले बन्दसत्र प्रभावित
अध्यक्ष पदका लागि १८ जनाले दाबी गरेका छन्, जसले गर्दा नेतृत्व चयनको प्रतिस्पर्धा बढेको छ। भावी नेतृत्वका आकांक्षीहरूले बन्दसत्रको काममा ध्यान दिनुको सट्टा मत माग्न सक्रियता देखाएकोले महाधिवेशनको तालिका अनुसारको काम अघि बढ्न सकेको छैन।
प्रतिनिधिहरू नाचगानमा व्यस्त
महाधिवेशनको प्रतिनिधिहरूले हलमा उपस्थित भए पनि नाचगानमा लागेकाले निर्धारित कार्यसूचीमा समयमै काम अघि बढ्न नसकेको सापकोटाले जानकारी गराएका छन्।
तेस्रो दिनका लागि नयाँ योजना
महाधिवेशनका आयोजकहरूले दोस्रो दिनको अवरोधलाई ध्यानमा राख्दै तेस्रो दिनका लागि नयाँ योजना बनाउने तयारीमा छन्। कार्यतालिकालाई पुनः समायोजन गरेर बाँकी कार्यसूचीहरू सम्पन्न गर्ने प्रयास गरिनेछ।
