जल तथा मौसम विज्ञान विभाग, मौसम पूर्वानुमान महाशाखाले हाल कोशी, वाग्मती र गण्डकी प्रदेशका केही स्थानमा हल्कादेखि मध्यम वर्षा भइरहेको जानकारी दिएको छ। अन्य ठाउँमा आंशिक बदलीदेखि मौसम सफा रहेको छ।
महाशाखाले आज दिउँसो कोशी र वाग्मती प्रदेशका एक-दुई स्थानमा भारी वर्षाको सम्भावना रहेको जनाएको छ। कोशी प्रदेशका तराई क्षेत्रका केही स्थानमा हावा-हुरीको पनि सम्भावना रहेको उल्लेख गरिएको छ।
रातिको मौसम
आज राति कोशी, मधेश, वाग्मती, गण्डकी र लुम्बिनी प्रदेशका थोरै स्थानहरूमा मेघगर्जन/चट्याङसहित हल्कादेखि मध्यम वर्षा हुनसक्ने पूर्वानुमान गरिएको छ। बाँकी प्रदेशमा आंशिकदेखि साधारणतया बदली रहनेछ।
भारी वर्षा र जोखिम
महाशाखाले विशेष गरी कोशी र वाग्मती प्रदेशमा भारी वर्षाको सम्भावनाले गेग्रान बहाव, बाढी, पहिरो, र भू-क्षय जस्ता प्रकोपको जोखिम बढ्न सक्ने चेतावनी दिएको छ। यी प्रकोपबाट बच्न आवश्यक सतर्कता अपनाउन सर्वसाधारणलाई आग्रह गरिएको छ।
आगामी ३ दिनको मौसम पूर्वानुमान
असोज १७ (बिहीबार):
दिउँसो कोशी, मधेश, वाग्मती र गण्डकी प्रदेशमा आंशिकदेखि साधारणतया बदली हुनेछ। अन्य प्रदेशमा मौसम आंशिक बदलीदेखि सफा रहनेछ। मेघगर्जन/चट्याङसहित हल्कादेखि मध्यम वर्षाको सम्भावना रहेका स्थानहरूमा भारी वर्षा पनि हुनसक्छ।
राति मौसम आंशिकदेखि साधारणतया बदली हुनेछ। कोशी, मधेश, वाग्मती, गण्डकी र लुम्बिनी प्रदेशका केही स्थानहरूमा हल्कादेखि मध्यम वर्षा हुनसक्छ।
असोज १८ (शुक्रबार):
दिउँसो कोशी, मधेश प्रदेशलगायत देशका पहाडी भु-भागमा आंशिकदेखि साधारणतया बदली रहनेछ। थोरै स्थानहरूमा हल्कादेखि मध्यम वर्षा र भारी वर्षाको सम्भावना छ। राति पनि देशभर आंशिकदेखि साधारणतया बदली हुनेछ।
असोज १९ (शनिबार):
देशभर आंशिकदेखि साधारणतया बदली हुनेछ। कोशी, वाग्मती, गण्डकी र लुम्बिनी प्रदेशका थोरै स्थानमा हल्कादेखि मध्यम वर्षाको सम्भावना रहनेछ।
