हालैका बाढीपहिरोमा परी अहिलेसम्म २४४ जनाको मृत्यु भएको छ भने १९ जना बेपत्ता रहेका छन्। साथै, अन्य १७९ जना घाइते भएका छन्।
गृह मन्त्रालयका प्रवक्ता ऋषिराम तिवारीका अनुसार, बाढीपहिरो प्रभावित क्षेत्रबाट १७ हजार १ सय ७४ जनाको उद्धार गरिएको छ। उद्धार कार्यसँगै सहायता परिचालन र अवरुद्ध राजमार्गको मर्मतसम्भार गरेर यातायात सञ्चालनको प्रयास भइरहेको छ।
पीडितलाई सहायता र राहत वितरण
प्रवक्ता तिवारीले बाढीपहिरो पीडितको विवरण स्थानीय स्तरबाट सङ्कलन भइरहेको जानकारी दिए। त्यहाँबाट प्राप्त विवरणपछि अस्थायी आवासका लागि सरकारले प्रदान गर्ने सहायता रकम वितरण गरिनेछ। हालसम्म स्थानीय तहबाट प्रभावित परिवारलाई खाद्यान्न र अन्य आवश्यक सहयोग प्रदान गरिएको छ।
सरकारले जिल्ला विपद् व्यवस्थापन कोषमार्फत मृतकका परिवारलाई २ लाख रुपैयाँका दरले आर्थिक सहायता प्रदान गरिरहेको छ। हालसम्म १६० परिवारले यस्तो सहायता पाइसकेका छन्।
काभ्रेपलाञ्चोक सबैभन्दा बढी प्रभावित
सबैभन्दा बढी प्रभावित जिल्ला काभ्रेपलाञ्चोक रहेको छ, जहाँ ७७ जनाको मृत्यु भएको छ। त्यहाँ हालसम्म ५९ मृतकका परिवारलाई आर्थिक सहयोग प्रदान भइसकेको प्रवक्ता तिवारीले जानकारी दिएका छन्।
