परराष्ट्रमन्त्री आरजु राणा देउवाले इजरायल र लेबनानमा रहेका नेपालीहरूको अवस्थाबारे नियमित जानकारी राख्न त्यहाँस्थित नेपाली दूतावासहरुलाई निर्देशन दिएकी छन्। आइतबार मन्त्रालयबाट भर्चुअल बैठक गर्दै उनले ती देशमा रहेका नेपालीहरूको सुरक्षाको अवस्थाबारे अद्यावधिक जानकारी लिएकी हुन्।
लेबनानको परिस्थिति र नेपालीको सुरक्षा
विशेषगरी लेबनानमा पछिल्लो समय विकसित परिस्थितिले नेपालमा चिन्ता बढेको भन्दै मन्त्री राणाले त्यहाँ रहेका नेपालीहरूलाई सम्पर्कमा राखेर आवश्यक सहयोग गर्न आग्रह गरिन्। उनले भनिन्, “यदि स्वदेश फर्किन चाहेमा वा उद्धारको आवश्यकता परेमा, त्यसका लागि आवश्यक तयारी गर्नुपर्छ।”
दूतावासहरूलाई निर्देशन: सम्पर्क व्यक्ति र हेल्पडेस्क स्थापनाको आदेश
मन्त्री राणाले इजरायल र लेबनानमा रहेका नेपाली दूतावासलाई सम्पर्क व्यक्ति तोकी ‘हेल्पडेस्क’ स्थापना गरेर समस्यामा परेका नेपालीलाई सहयोग गर्न निर्देशन दिइन्। साथै, उद्धारको आवश्यकता परेमा नेपाल सरकार तयारी अवस्थामा रहनुपर्ने बताइन्।
दूतावासको रिपोर्ट: अहिले नेपालीहरू सुरक्षित
इजिप्टका लागि नेपाली राजदूत सुशील लम्सालले लेबनानको पछिल्लो अवस्थाबारे जानकारी दिँदै त्यहाँका नेपालीहरूको अवस्था सामान्य रहेको र तीन जना मात्र सम्पर्कमा आएको जानकारी गराएका छन्। उनीहरू सबै बेरुतमा सुरक्षित रहेको दूतावासले जनाएको छ।
इजरायलमा रहेका नेपालीहरूको सुरक्षा स्थिति
इजरायलका लागि कार्यवाहक नेपाली राजदूत कुमार श्रेष्ठले इजरायलमा रहेका करिब चार हजार पाँच सय नेपाली सुरक्षित रहेको र त्यहाँको अवस्था सामान्य रहेको जानकारी दिएका छन्। हालसम्म कुनै पनि नेपालीले समस्या भोग्नुपरेको जानकारी प्राप्त नभएको उनले स्पष्ट पारे।
सोही अवसरमा पाकिस्तानका लागि नेपाली राजदूत तापस अधिकारीले इरानको पछिल्लो अवस्थाबारे जानकारी गराएका थिए।
