काठमाडौं - जाजरकोट जिल्लाको त्रिभुवन माध्यमिक विद्यालयमा ‘ईक्यान विद्यालय पुस्तकालय’ स्थापनाका लागि ईक्यान सदस्यहरूबाट सङ्कलित रु सात लाख पचहत्तर हजार पाँच सय छब्बीस सहयोग प्रदान गरिएको छ।
उक्त रकमलाई आज ईक्यान कार्यालयमा त्रिभुवन माध्यमिक विद्यालयका प्रधानाध्यापक भक्तबहादुर मल्ल र कथालय इन्क. प्रा. लि. का प्रतिनिधि राजीव धर जोशीलाई औपचारिक रूपमा हस्तान्तरण गरिएको हो।
भूकम्प राहत कोषबाट पुस्तकालय निर्माण
यस पुस्तकालय निर्माणका लागि आवश्यक रकम ईक्यान सदस्यहरूले भूकम्प राहत कोषबाट सङ्कलन गरेका थिए। यस रकमले जाजरकोटको त्रिभुवन माध्यमिक विद्यालयमा पुस्तकालय स्थापना गरी स्थानीय विद्यार्थीहरूलाई अध्ययनका लागि पुस्तक तथा अन्य शैक्षिक सामग्री उपलब्ध गराउनमा महत्वपूर्ण योगदान पुर्याउनेछ।
शिक्षा र सामुदायिक विकासमा ईक्यानको भूमिका
यो परियोजना ईक्यानको कर्पोरेट सामाजिक उत्तरदायित्व (सिएसआर) अन्तर्गत शिक्षा र सामुदायिक पूर्वाधारलाई सुदृढ बनाउने उद्देश्यले सञ्चालन गरिएको हो। ईक्यानको यस पहलले शिक्षाको विकासमा सहयोग पुर्याउने विश्वास गरिएको छ।
ईक्यान अध्यक्षको आभार
ईक्यानका अध्यक्ष शेषराज भट्टराईले यस परियोजनालाई सफल बनाउन सहयोग पुर्याउने सबै सदस्यहरूलाई धन्यवाद व्यक्त गर्दै, सामुदायिक विकास र शिक्षामा थप सक्रिय योगदान पुर्याउने प्रतिबद्धता जनाएका छन्।
