वीरगञ्ज — नेपाल सरकारका खानेपानी मन्त्री प्रदिप यादवले वीरगञ्ज कारागारको निरीक्षण तथा अनुगमन गरेका छन्। यस क्रममा उनले कैदिबन्दीहरूसँग भेटेर उनीहरूको दैनिक जीवनमा आइरहेका समस्याहरूको प्रत्यक्ष जानकारी लिएका छन्।
कैदीबन्दीहरूको समस्या
कैदिबन्दीहरूले मन्त्री यादवलाई कारागारभित्रको शौचालय, विद्युत्, र खानेपानीको अभावलगायत महिला कैदीहरूको लागि जीर्ण अवस्थामा रहेको कारागार जस्ता गम्भीर समस्याहरू रहेको जानकारी दिए। विशेषगरी महिला कैदीहरूको बसोबास गर्ने ठाउँको अवस्था दयनीय भएको र सुधारको आवश्यकता रहेको कैदिबन्दीहरूले बताए।
राज्यको दायित्व र समाधानको आश्वासन
मन्त्री यादवले कैदिबन्दीहरूको समस्यालाई सम्बोधन गर्दै, ‘‘समाजका हरेक नागरिकलाई आधारभूत सुविधा र सम्मानजनक वातावरण प्रदान गर्नु राज्यको दायित्व हो,’’ भनेका छन्। उनले नेपाल सरकार यस विषयमा गम्भीर रहेको र छिट्टै समाधानका लागि आवश्यक छलफल अघि बढाइने प्रतिबद्धता जनाएका छन्।
महिला कैदीहरूको लागि सुधारात्मक कदम
महिला कैदीहरूका लागि शौचालय तथा अन्य पूर्वाधारहरूको सुधार र व्यवस्थित खानेपानीको व्यवस्था सुनिश्चित गर्न मन्त्री यादवले सम्बन्धित निकायलाई तत्काल निर्देशन दिएका छन्। उनले महिला कैदीहरूको लागि पूर्वाधारको स्तरोन्नति र आवश्यक जीर्णोद्धार कार्य अघि बढाइने प्रतिबद्धता व्यक्त गरे।
सहकार्यको लागि धन्यवाद
यस अवसरमा मन्त्री यादवले वीरगञ्ज महानगरका मेयर राजेशमान सिंह, पर्सा प्रहरीका प्रमुख एसपी कुमोद ढुङ्गेल र अन्य सरोकारवालाहरूको उपस्थिति तथा सहकार्यप्रति धन्यवाद व्यक्त गरेका छन्। मन्त्री यादवले कारागार सुधारमा सबै पक्षको सहभागिता र सहयोगले सकारात्मक परिणाम ल्याउन सक्ने विश्वास व्यक्त गरे।
