वीरगन्ज । वीरगन्जमा ‘मधेस साहित्य महोत्सव’ को आयोजना हुने भएको छ । उत्कर्ष नेपालको आयोजनामा यहि चैत २२ र २३ गते ‘मधेस साहित्य महोत्सव’ आयोजना हुन लागेको हो ।
मधेसको सामाजिक,सांस्कृतिक र साहित्यिक उन्नयनलाई प्रवर्द्धन गर्ने उद्देश्यले वीरगन्जमा ‘मधेस साहित्य महोत्सव’ आयोजना गर्न लागिएको मधेस साहित्य महोत्सव आयोजन समितिका संयोजक गणेश लाठले बताए ।
वीरगन्जमा बुधबार आयोजित पत्रकार सम्मेलनमा संयोजक लाठले दुई दिने ‘मधेस साहित्य महोत्सव’मा तराई–मधेसका २२ वटा जिल्लाको साहित्य,भाषा,कला र संस्कृतिलाई समेटिने बताए ।
महोत्सवमा तराई–मधेसका भोजपुरी,मैथली,अवधि,थारु,माडवारी,उर्दु ,हिन्दी भाषाका साथै नेपाली र नेवारी भाषाका साहित्यकार,कवि,कलाकार,चित्रकार,विश्लेषक,स्तम्भकार,लेखक,सर्जकलगायतले आ–आफना सृजना,कला,विचार र अनभुवहरु प्रस्तुत गर्ने उनले बताए ।उनका अनुसार,‘मधेस साहित्य महोत्सव’ मा छिमेकी मुलुक भारतका पनि साहित्यकारहरू सहभागी हुने जनाएको छ ।
