काठमाडौँ । इण्डियन प्रिमियर लिग (आइपिएल) २०२५ मा कोलकाता नाइट राइडर्सले दोस्रो जित निकालेको छ । दोस्रो जित दर्ता गर्नेक्रममा कोलकाताले बिहीबार राति सनराइजर्स हैदराबादलाई ८० रनले हरायो ।
हैदराबादले भने लगातार तेस्रो हार बेहोर्यो । आफ्नो चौथो खेलमा कोलकाताले दिएको २ सय १ रनको लक्ष्य पछ्याएको हैदराबाद १६.४ ओभरमा १ सय २० रनमै अलआउट भयो ।
उसका लागि हेनरिक क्लासेनले ३३, कामिन्दु मेन्डिसले २७, नितिशकुमार रेड्डीले १९ तथा कप्तान प्याट कमिन्सले १४ रन जोडे । कोलकाताका लागि वैभव अरोरा र वरुण चक्रवर्तीले तीनरतीन, आन्द्रे रसेलले दुई तथा हर्षित राना र सुनिल नारायणले एकरएक विकेट लिए ।
त्यसअघि इडेन गार्डेनमा टस हारेर ब्याटिङको निम्तो पाएको घरेलु टिम कोलकाताले निर्धारित २० ओभरमा ६ विकेट गुमाएर २ सय रन बनायो ।
उसका लागि उपकप्तान वैंकटेश अय्यर र अंगकृष रघुवंशीले अर्धशतकीय पारी खेले । अय्यरले २९ बलमा सात चौका र तीन छक्कासहित ६० र रघुवंशीले ३२ बलमा पाँच चौका र दुई छक्कासहित ५० रनको पारी खेलेका हुन् ।
यस्तै, कप्तान अजिंक्य रहाणेले ३८ र रिंकु सिंहले अविजित ३२ रन जोडे । हैदराबादका लागि मोहम्मद शामी, कप्तान प्याट कमिन्स, हर्षल पटेल, जीशान अन्सारी र कामिन्दु मेन्डिसले एकरएक विकेट लिए ।
यो जितपछि कोलकाता अंक तालिकाको पाँचौं स्थानमा उक्लिएको छ । उसले चार म्याच खेल्दा दुईमा जित र दुई खेलमा हार बेहोरेको छ ।यता पुछारमा रहेको हैदराबादले चार म्याच खेल्दासम्म तीनमा हार तथा एक खेलमा मात्र जित निकालेको छ ।
