काठमाडौँ । माध्यमिक शिक्षा परीक्षा (एसईई) सकिएको भोलिपल्टदेखि नेपाल शिक्षक महासङ्घले आन्दोलन सुरु गरेपछि एसईईको उत्तरपुस्तिका परीक्षणमा ढिलाइ हुने हो कि भन्ने चिन्ता व्यक्त भएको छ। यो वर्षको माध्यमिक शिक्षा परीक्षा (एसईई) परीक्षा चैत ७ गतेदेखि सुरु भएर १९ गते सकिएको थियो।
एसईईमा झन्डै पाँच लाख विद्यार्थीहरू सहभागी भएका थिए। विभिन्न विषयका गरेर ती विद्यार्थीका ३५ लाख उत्तरपुस्तिका जाँच गर्नुपर्ने अवस्था रहेको राष्ट्रिय परीक्षा बोर्डका अध्यक्ष महाश्रम शर्माले बताए।
पठनपाठन र सबै सरकारी काम बन्द गरेर आन्दोलनका लागि राजधानी काठमाडौँ आएका शिक्षकहरूले भने यसपटक माग पूरा नभई घर नफर्कने अडान लिएका छन्। यता शिक्षकहरूले आन्दोलन जारी राखेका बेला बिहीवार शिक्षा, विज्ञान तथा प्रविधि मन्त्रालयले उनीहरूलाई वार्ताका लागि आह्वान गरेको छ। तर सरकारले वार्तामा बोलाए पनि त्यसको आवश्यकता अहिले नरहेको आन्दोलनरत शिक्षकहरूले बताएका छन्।
यसअघि शिक्षक तथा विद्यालयका कर्मचारीलगायतको सेवासुविधा र पदोन्नतिसँग सम्बन्धित विभिन्न मागहरू राखेर शिक्षकहरूले पटकपटक आन्दोलन गरेका थिए। उनीहरूले हाल संसद्को शिक्षा समितिअन्तर्गतको उपसमितिमा दफावार छलफलमा रहेको उक्त विधेयकको मस्यौदा बन्दादेखि नै आन्दोलन गरेका थिए।
