धनगढी । सुदूरपश्चिम विश्वविद्यालय अन्तर्गत कैलाली बहुमुखी क्याम्पस (केएमसी) मा यही चैत्र २७ गते हुने स्वतन्त्र विद्यार्थी युनियनको निर्वाचनका लागि अध्यक्ष पदमा उम्मेदवारी दिएका नेपाल विद्यार्थी सङ्घ (नेविसंघ)का उम्मेदवार सन्तोष पन्तले शैक्षिक वातावरण निमार्ण गर्नको लागि नेविसंघको उम्मद्वारी रहेको बताएका छन् ।
अहिले चुनावी मैदानमा उत्रिएका पन्तले आम विद्यार्थीहरुको सकारात्मक सुझावकै कारण सो चुनावी मैदानमा होमिएको बताएका हुन् । दुई वर्ष स्ववियूको सचिव पदमा रहेर काम गरिसकेका पन्तले अब नेतृत्वमा आएर विभिन्न विद्यार्थीहरूका समस्याहरूलाई सम्बोधन गरी पहल गर्नको लागि पुरै प्यानल बनाएर अध्यक्ष पदमा उम्मेदवारी दिएको बताउँदै ऊर्जाका साथ चुनावी माहोलमा आएको उनको भनाई छ ।
‘दुई वर्ष स्ववियूको सचिव पदमा रहेर काम गरिसकेको छु,’ अध्यक्ष पदका उम्मेदवार पन्तले भने, दुई वर्षमा धेरै विद्यार्थीको मन जितिसकेको छु, अब शैक्षिक वातावरण निमार्ण गर्नको लागि हाम्रो उम्मद्वारी हो ।’
दुई वर्षको अनुभवलाई अब विद्यार्थीको प्रतिभाहरूलाई बाहिर ल्याई देश विदेशमा चिनाउनमा जोड दिने बताउँदै विद्यार्थीहरूलाई सिपमूलक तर्फ प्रेरित गराउने गरी पहल गर्ने बताए । अहिले क्याम्पसमा रहेको पुस्तकालयमा माग अनुसार पुस्तक नभएको समस्या भए पनि आगामी दिनमा प्रविधिका माध्यमबाट सो समस्या समाधान गर्ने बताए ।
‘दुई वर्षको रेकर्ड हेर्ने हो भने हामीले ५० लाख पुस्तक मगाएका छौँ । त्यसले पनि पुगेको छैन । अब शिक्षकहरूले विद्यार्थीहरूलाई पिडिएफ फाईल पनि दिनुपर्छ भन्ने हाम्रो मान्यता हो । यसका लागि हामी शिक्षकहरूसँग छलफल गर्नेछौँ ।’ उनले भने ।
यस्तै उनले छुट्टै पुस्तकालय निमार्णको लागि पनि पहल गर्ने बताउँदै टाढाबाट छात्राहरू पढ्नको लागि यहाँ आउने तर उनीहरूले बस्ने ठाउँ समेत नपाउने समस्या रहेकाले अहिलेको भवनलाई व्यवस्थित गरी तत्काल सञ्चालन गर्न पहल गर्ने र विद्यार्थीहरू समस्यामा पर्न नदिन सहजीकरणलाई विशेष महत्त्व दिई खेलकुदका लागि छुट्टै खेल मैदानको लागि विभिन्न निकायसँग पहल गर्ने योजना रहेको बताए ।
पन्तको नेतृत्वमा नेविसंघबाट ओम प्रकाश वस्ती सचिव,कोषाध्यक्षमा प्रमिला शाह,सदस्यमा राम रोकाया,सरिता भट्ट,पूजा विष्ट,जनक खड्का,देवेन्द्र धामी,विनीता चौधरी,राम बहादुर बोगटी,पूजा ओड र गणेश दाहाल उम्मेदवार रहेका छन् ।
को हुन् अध्यक्ष पदका उम्मेदवार पन्त
पन्त कैलाली बहुमुखी क्याम्पस एमबिए पहिलो सेमेस्टर अध्ययनरत विद्यार्थी हुन् । उनी २०७९/८१ को स्ववियू सचिव समेत हुन् । केएमसीको विद्यार्थी साहित्य प्रतिष्ठानको अध्यक्षमा रहेर काम गरेको अनुभव समेत उनिसंघ रहेको छ । यस्तै बोलन्या थली संस्थाको सचिव रोष्ट्रयाक्ट क्लब अफ धनगढीको उपाध्यक्ष, नेपाल जेसीजको राष्ट्रिय जुनियर जेसीस संयोजक,धनगढी जुनियर जेसीजको अध्यक्ष, क्रेटिभ चिल्र्डेन क्लब पुलिस स्कुल धनगढीको अध्यक्ष लगायत अन्य सङ्घ संस्थामा रहेर काम गरेको अनुभव पन्तसँग रहेको छ ।
