काठमाडौं । नेपाली कांग्रेसका महामन्त्री गगन थापाले राजतन्त्र ‘नचाहिने’ र ‘थोत्रो’ भइसकेको बताएका छन् ।
शनिबार बाह्रखरी मिडियाले काठमाडौंमा आयोजना गरेको एनसेल बाह्रखरी गल्फ तथा आर्थिक परिसंवाद कार्यक्रममा महामन्त्री थापाले यस्तो बताएका हुन् ।
उनले पूर्वराजा ज्ञानेन्द्र शाहप्रति लक्षित गर्दै विगतमा मिल्काइसकेको पात्रको बारेमा छलफल गर्ने समय नरहेको टिप्पणी गरे ।
“हिजो लगेर एक ठाउँमा मिल्काइसकेको, थन्काइसकेको विषय र पात्रको बारेमा छलफल गरेर टाइम खेर फाल्ने होइन,’’ महामन्त्री थापाले भने ।
यस्तै उनले अबको एक दशक आईटीको निर्यातलाई पाँचगुणा बनाउने र तलब तीनगुणा बढाउने विषयमा बहस गर्नुपर्ने बताएका छन् ।
कीर्तिपुरको डाँडामा बसेर, हातमा ल्यापटप राखेर महिनाको दुई लाख, तीन लाख, चार लाख यही डाँडामा बसेर आम्दानी गर्ने पनि छन् भन्ने मानक स्थापना गर्न सकिने अभिव्यक्ति दिएपछि ट्रोल बनेका उनले सोही अभिव्यक्ति दृढतापूर्वक दोहोर्याएका छन्।
आईटीको पूर्वाधार बढाउने विषयमा बहस गरिनुपर्ने बताए । उनले अबको ८–१० वर्षभित्र कीर्तिपुरको डाँडामात्रै नभई अन्य ठाउँमा पनि दुई–चार लाख रुपैयाँ कमाउन सक्ने स्थिति बनाउन सकिने बताए ।
