धनगढी । सुदूरपश्चिमका प्रदेश प्रमुख नजिर मियाँले प्रदेश सभाको जारी अधिवेशन अन्त्य गरेका छन् ।सोमबार बसेको प्रदेश मन्त्रीपरिषद्को बैठकले अधिवेशन अन्त्य गर्ने निर्णय गर्दै प्रमुख प्रमुखलाई सिफारिस गरेको थियो ।
सरकारको सिफारिसका आधारमा नै प्रदेश प्रमुख मियाँले सोमबार राति १२ बजेदेखि लागू हुनेगरी संविधानको धारा १८३ को उपधारा (२) बमोजिम अधिवेशन अन्त्य गरेको प्रदेश सभा सचिवालयले जनाएको छ ।
सचिवालयले अधिवेशन अन्त्य गरेको सूचना सबै प्रदेश सभा सदस्यहरूलाई राति नै जानकारी गराइसकेको छ ।२७ साउन २०८१ मा प्रदेश प्रमुखले सभाको पाँचौ अधिवेशन आह्वान गरेका थिए ।
सुदूरपश्चिममा प्रतिपक्षी दलले लगातार प्रदेश सभामा अवरोध सिर्जना गर्दै आएपछि बैठक अघि बढ्न सकेको थिएन तर सरकारले भने प्रतिपक्षी दलको विरोधकैबीच अधिवेशन अन्त्य गर्ने निर्णय गरेको हो ।
