वीरगंज - प्रधानमन्त्री केपी शर्मा ओलीले हावाहुरी प्रभावित बारा र पर्सा जिल्लाको निरीक्षण गरेका छन्। झापाको कार्यक्रम रद्द गरेर प्रधानमन्त्री ओलीले आज अपराह्न प्रभावित क्षेत्रको निरीक्षण गरेका हुन्।
सो क्रममा उनले बाराको कलैयास्थित अस्पतालमा पुगेर घाइतेको अवस्थाबारे पनि जानकारी लिएका छन्। निरीक्षणका क्रममा प्रधानमन्त्री ओलीले राहत र उद्धारमा कुनै समस्या हुन नदिन निर्देशन दिए। अस्पातालमा उपचार गराइरहेका ४९ जनाको घाइते अवस्था बुझी प्रधानमन्त्री ओलीले घाइतेको यथाशीघ्र भरपर्दो उपचार व्यवस्था मिलाउन मातहतका निकायलाई निर्देशन दिए।
प्रधानमन्त्रीको उक्त टोलीले पर्साको वीरगंजस्थित नारायणी अस्पतालमा उपचार गराइरहेका घाइतेको अवस्थाबारे जानकारी लिएकाे छ। प्रधानमन्त्रीसँगै घटनास्थलमा उपप्रधान तथा स्वास्थ्यमन्त्री उपेन्द्र यादव र गृहमन्त्री रामबहादुर थापा बादल पनि छन्।
http://nepalipublic.com/archives/31238#.XKHou9IzbIU
साथै कलैयामा प्रधानमन्त्रीका साथमा भौतिक पूर्वाधार मन्त्री रघुवीर महासेठ, शहरी विकासमन्त्री मोहम्मद इस्तियाक राई र तीनवटै सुरक्षा निकायका प्रमुखहरु सहभागी छन्। त्यहाँ प्रधानमन्त्रीले हावाहुरीबाट भएको क्षति, उद्धार तथा राहतमा भइरहेको प्रयासबारे ‘ब्रिफिङ’ लिएका छन्।
आइतवार साँझ आएको हावाहुरीले पूर्वी तराईका दुई जिल्ला बारा र पर्सामा ३१ जनाको मृत्यु भएको पुष्टि भएको छ। हावाहुरीले कलैया उपमहानगरपालिकासहित महागढीमाई र पचरौता नगरपालिका तथा प्रसौनी, फेटा, सुवर्ण र परवानीपुर गाउँपालिकामा धनजनको क्षति भएको छ।
http://nepalipublic.com/archives/31277#.XKHnHNIzbIU
