वीरगंज - नेपाली कांग्रेसका सभापति शेरबहादुर देउवा आइतबार साँझको हावाहुरीका कारण प्रभावित बनेको बारा र पर्सा जिल्ला पुगेका छन्। मंगलबार पार्टीका अन्य नेतासहित त्यहाँ पुगेका देउवाले पीडित परिवार तथा घाइतेहरुसँग भेटघाट गरे।
सो क्रममा उनले हावाहुरीका कारण बारा र पर्सामा ठूलो क्षति पुगेकोे भन्दै राष्ट्रिय शोकका रुपमा लिन सरकारलाई आग्रह गरे।
देउवाले सामाजिक सञ्जाल ट्विटरमा ट्विट गर्दै लेखेका छन्, ‘हावाहुरीले बारा र पर्सामा निकै ठूलो मानविय र भौतिक क्षति पुर्याएको छ। २७ जनाले ज्यान गुमाएको र ४ सयभन्दा बढी घाईते भएको प्राकृतिक विपत्तिले यो क्षेत्रको अवस्था निकै कठिन बनाएको छ। म सरकारलाई यति ठूलो विपत्तिलाई राष्ट्रिय शोकको रुपमा लिन आग्रह गर्दछु।’
उनले पीडितहरुका लागि नेपाली कांग्रेसले २५ लाख रुपैया सहयोग गर्नेसमेत घोषणा गरे। देउवाले मृतक तथा घाइते परिवारलाई यथाशीघ्र उचित क्षतिपूर्ति दिई अवासको लागि पुनःनिर्माणको कार्य पनि शुरु गर्न आग्रह गरे।
उनले भने, ‘मैले प्रभावित सबै क्षेत्रको पुगेर त्यहाको अवस्थाबारे जानकारी लिएको छु। अवस्था निकै दुखद अवस्था छ, संघीय सरकारको काम कारवाही सुस्त पाएको छु, यथाशीघ्र क्षतिपूर्ती निर्धारण गरी उपलब्ध गराउनु पर्छ, साथसाथै पुर्न निर्माण्को काम पनि थाल्नु पर्छ।’
यस कार्यमा यदि सरकार चुक्यो वा ढिलाई गर्यो भने आन्दोनल थाल्ने उनले चेतावनी दिए।
