वीरगंज - आइतबारको हावाहुरीका कारण प्रभावित बारा र पर्साका विभिन्न स्थानमा पुगेका पूर्वप्रधानमन्त्री तथा नेकपा अध्यक्ष पुष्पकमल दाहाल ‘प्रचण्ड’ले पीडित तथा घाइतेलाई भेटेका छन्। दाहाल मंगलबार मध्यान्ह १२ बजे नेपाली सैनिक हेलिकोप्टरबाट वीरगंजस्थित सेनाकाे चण्डिका प्रसाद गणमा उत्रेका थिए।
त्यसपछि गाडीबाट कलैया अस्पताल, पुरैनिया, भरवलिया, भलुही, खुटवा, चैनपुर, नारायणी अस्तपाल र वीरगंज हेल्थ केयर अस्पतालमा दाहालले घाइते तथा मृतकका परिवारजनसँग भेटेका हुन्।
प्रभावित क्षेत्र तथा अस्पतालमा पुगेर दाहालले पीडित तथा घाइतेलाई सान्त्वना दिएका छन्। उनले सञ्चारकर्मीहरुसँग संक्षिप्त कुराकानी गर्दै भने, ‘हावाहुरीबाट प्रभावित क्षेत्रमा रातह वितरण तथा घाइतेको उपचार भइरहेको छ। सरकारले सबै सुरक्षा निकायलाई त्यसमा परिचालन गरेको छ। त्यसमा कुनै कमी छैन।’
उनले हावाहुरी प्रभावितलाई राहत, मृतकका परिवारलाई क्षतिपूर्ति र पुननिर्माणको काम पनि सरकारले गर्नुपर्ने बताए।
